ଭୁବନେଶ୍ୱର: ଅକ୍ଟୋବର ମାସ ଆରମ୍ଭରୁ ଓଡ଼ିଶାର ପାଣିପାଗରେ ହଠାତ୍ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ରାଜ୍ୟରେ ବର୍ଷା କମିବା ସହିତ ତାପମାତ୍ରା ଦ୍ରୁତ ଗତିରେ ବୃଦ୍ଧି ପାଇଛି। ବିଶେଷ କରି ଉପକୂଳ ଓଡ଼ିଶାରେ ଗୁଳୁଗୁଳି ଏବଂ ପ୍ରଖର ତାତି ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି।
ପୁରୀରେ ୧୩୦ ବର୍ଷର ରେକର୍ଡ ଭଙ୍ଗ: ଗତ ସୋମବାର ରାଜ୍ୟର ବିଭିନ୍ନ ସ୍ଥାନରେ ଅସହ୍ୟ ଗରମ ଅନୁଭୂତ ହୋଇଥିଲା। ପୁରୀରେ ତାପମାତ୍ରା ୩୬.୬ ଡିଗ୍ରୀ ସେଲ୍ସିୟସ୍ ରେକର୍ଡ କରାଯାଇଥିବା ବେଳେ ପାରାଦୀପରେ ୩୬.୫ ଡିଗ୍ରୀ ଏବଂ ଭୁବନେଶ୍ୱରରେ ୩୫.୮ ଡିଗ୍ରୀ ସେଲ୍ସିୟସ୍ ରହିଥିଲା।
ବିଶେଷକରି ପୁରୀର ଏହି ତାପମାତ୍ରା ସହରର ୧୩୦ ବର୍ଷର ଆକାଶଜଳବାୟୁ ଇତିହାସରେ ଅକ୍ଟୋବର ମାସର ଦ୍ୱିତୀୟ ସର୍ବୋଚ୍ଚ ତାପମାତ୍ରା ରୂପେ ପଞ୍ଜୀକୃତ ହୋଇଛି। ଏହା ସ୍ୱାଭାବିକଠାରୁ ପ୍ରାୟ ୪.୧ ଡିଗ୍ରୀ ଅଧିକ ଥିଲା। ୧୮୯୬ ମସିହାର ରେକର୍ଡ ଅନୁଯାୟୀ ପୁରୀରେ ପୂର୍ବରୁ ସର୍ବାଧିକ ୩୬.୭ ଡିଗ୍ରୀ ତାପମାତ୍ରା ରେକର୍ଡ ହୋଇଥିଲା।
ତାତି ବୃଦ୍ଧିର କାରଣ: ପାଣିପାଗ ବିଶେଷଜ୍ଞଙ୍କ ମତରେ, ଦକ୍ଷିଣ-ପଶ୍ଚିମ ମୌସୁମୀ ବାୟୁ ଏବେ ପ୍ରତ୍ୟାହାର ପର୍ଯ୍ୟାୟରେ ଥିବାରୁ ମୌସୁମୀ ପ୍ରବାହ ଦୁର୍ବଳ ହୋଇପଡ଼ିଛି। ଆକାଶ ମେଘମୁକ୍ତ ରହୁଥିବାରୁ ପ୍ରଖର ସୂର୍ଯ୍ୟକିରଣ ସିଧାସଳଖ ପୃଥିବୀ ପୃଷ୍ଠରେ ପହଞ୍ଚୁଛି, ଯାହାଫଳରେ ଦିନର ତାପମାତ୍ରା ହଠାତ୍ ବୃଦ୍ଧି ପାଇଛି।
୯ଟି ଜିଲ୍ଲଲାକୁ ବର୍ଷା ଓ ଘଡ଼ଘଡ଼ି ଚେତାବନୀ: ଅନ୍ୟପକ୍ଷରେ ଗରମ ସାଙ୍ଗକୁ ରାଜ୍ୟର କିଛି ଅଞ୍ଚଳରେ ବର୍ଷା ଏବଂ କାଳବୈଶାଖୀ ସମ୍ଭାବନାକୁ ଦୃଷ୍ଟିରେ ରଖି ଭାରତୀୟ ପାଣିପାଗ ବିଭାଗ ପକ୍ଷରୁ ସତର୍କତା ଜାରି କରାଯାଇଛି। ଆଜି ରାଜ୍ୟର ୯ଟି ଜିଲ୍ଲାକୁ ବର୍ଷା, ବଜ୍ରପାତ ଏବଂ ଝଡ଼ତୋଫାନ ନେଇ ‘ୟେଲୋ ୱାର୍ଣ୍ଣିଂ’ ଦିଆଯାଇଛି। ଆଗାମୀ ଦୁଇରୁ ତିନି ଦିନ ପର୍ଯ୍ୟନ୍ତ ଏହିପରି ପାଣିପାଗ ଜାରି ରହିବ ବୋଲି ଆକଳନ କରାଯାଇଛି।
