ନୂଆଦିଲ୍ଲୀ: ପାକିସ୍ତାନର ବେଲୁଚିସ୍ତାନ ପ୍ରଦେଶରେ ଆଜି ସକାଳେ ଏକ ଶକ୍ତିଶାଳୀ ଭୂକମ୍ପ ଅନୁଭୂତ ହୋଇଛି। ଭାରତର ‘ନ୍ୟାସନାଲ ସେଣ୍ଟର ଫୋର୍ ସିସ୍ମୋଲୋଜି’ର ସୂଚନା ଅନୁଯାୟୀ, ରିକ୍ଟର ସ୍କେଲ୍ରେ ଏହି ଭୂକମ୍ପର ତୀବ୍ରତା ୫.୮ ରେକର୍ଡ କରାଯାଇଛି।
NCS ଅନୁଯାୟୀ, ଶନିବାର ସକାଳ ୧୦:୩୭ ମିନିଟ୍ରେ ଏହି ଭୂକମ୍ପ ଝଟ୍କା ଅନୁଭୂତ ହୋଇଥିଲା। ଏହାର କେନ୍ଦ୍ରବିନ୍ଦୁ ୨୭.୯୪୪ ଉତ୍ତର ଅକ୍ଷାଂଶ ଏବଂ ୬୬.୫୩୨ ପୂର୍ବ ଦ୍ରାଘିମାରେ, ଭୂପୃଷ୍ଠରୁ ମାତ୍ର ୧୫ କିଲୋମିଟର ଗଭୀରତାରେ ରହିଥିଲା।
ଭୂକମ୍ପର କେନ୍ଦ୍ରବିନ୍ଦୁ କମ୍ ଗଭୀରତାରେ ଥିବାରୁ ଆଖପାଖ ଅଞ୍ଚଳରେ ତୀବ୍ର କମ୍ପନ ଅନୁଭୂତ ହୋଇଛି। ଏହାପୂର୍ବରୁ ଗତ ଜୁନ୍ ୨୬ ତାରିଖରେ ମଧ୍ୟ ପାକିସ୍ତାନରେ ୫.୩ ତୀବ୍ରତାର ଏକ ଭୂକମ୍ପ ରେକର୍ଡ କରାଯାଇଥିଲା, ଯାହାର ଗଭୀରତା ୭୫ କିଲୋମିଟର ରହିଥିଲା।
ଭୌଗୋଳିକ ଅବସ୍ଥିତି ଅନୁଯାୟୀ, ଭାରତୀୟ ଏବଂ ୟୁରେସୀୟ ଟେକ୍ଟୋନିକ୍ ପ୍ଲେଟ୍ଗୁଡ଼ିକର ମିଳନ ସ୍ଥଳରେ ପାକିସ୍ତାନ ଅବସ୍ଥିତ। ବିଶେଷ କରି ବେଲୁଚିସ୍ତାନ, ଖାଇବର ପାଖତୁନଖ୍ୱା ଏବଂ ଗିଲଗିଟ୍-ବାଲଟିସ୍ତାନ ଅଞ୍ଚଳଗୁଡ଼ିକ ମୁଖ୍ୟ ଫଲ୍ଟ ଲାଇନ୍ ନିକଟରେ ରହିଥିବାରୁ ଏଠାରେ କ୍ରମାଗତ ଭାବେ ସିସ୍ମିକ୍ କାର୍ଯ୍ୟକଳାପ ବା ଭୂକମ୍ପ ଅନୁଭୂତ ହୋଇଥାଏ।
