ପୁରୀ ଶ୍ରୀମନ୍ଦିର ଉପରେ ପୁଣି ଉଡ଼ିଲା ରହସ୍ୟମୟ ଡ୍ରୋନ୍: ସୁରକ୍ଷା ବ୍ୟବସ୍ଥାକୁ ନେଇ ବଢ଼ିଲା ଚିନ୍ତା

ପୁରୀ: ବାରମ୍ବାର କଟକଣା ଏବଂ କଡ଼ା ସୁରକ୍ଷା ସତ୍ତ୍ୱେ ବିଶ୍ୱପ୍ରସିଦ୍ଧ ପୁରୀ ଶ୍ରୀଜଗନ୍ନାଥ ମନ୍ଦିର ଉପରେ ପୁଣିଥରେ ଏକ ଡ୍ରୋନ୍ ଉଡ଼ିଥିବା ଦେଖିବାକୁ ମିଳିଛି। ଆଜି ଭୋର ସକାଳେ ଶ୍ରୀମନ୍ଦିର ଉପରେ ଏହି ଡ୍ରୋନ୍ ଘୂରି ବୁଲୁଥିବା ଦେଖିବାକୁ ମିଳିବା ପରେ ମନ୍ଦିରର ସୁରକ୍ଷା ବ୍ୟବସ୍ଥାକୁ ନେଇ ପୁଣି ଥରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି ହୋଇଛି।

ପ୍ରାପ୍ତ ସୂଚନା ଅନୁଯାୟୀ, ଆଜି ସକାଳ ପ୍ରାୟ ୫ଟା ସମୟରେ ମନ୍ଦିରର ଉତ୍ତର ପାର୍ଶ୍ୱ ତଥା ଶ୍ରୀମନ୍ଦିର ଏବଂ କରିଡର୍ ଅଞ୍ଚଳ ଉପରେ ଏକ ଅଜଣା ଡ୍ରୋନ୍ ଉଡ଼ୁଥିବାର ନଜର ଆସିଥିଲା। ଏହି ଡ୍ରୋନ୍ ଜରିଆରେ ମନ୍ଦିରର ଗୋପନୀୟ ଭିଡିଓ କିମ୍ବା ଫଟୋ କ୍ୟାପ୍ଚର୍ କରାଯାଉଥିବା ସନ୍ଦେହ କରାଯାଉଛି। ତେବେ କିଏ ଏବଂ କେଉଁଠାରୁ ଏହି ଡ୍ରୋନ୍ ଅପରେଟ୍ କରୁଥିଲା, ସେ ସମ୍ପର୍ଣ୍ଣ ସ୍ପଷ୍ଟ ହୋଇନାହିଁ। ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି।

ବାରମ୍ବାର ସୁରକ୍ଷା ଉଲ୍ଲଂଘନ ଓ ଭକ୍ତଙ୍କ ଅସନ୍ତୋଷ:ଶ୍ରୀମନ୍ଦିର ଏବଂ ଏହାର ଚତୁର୍ଦ୍ଦିଗକୁ ‘ନୋ-ଡ୍ରୋନ୍ ଜୋନ୍’ ବା ନିଷ୍ଷିଦ୍ଧାଞ୍ଚଳ ଭାବେ ଘୋଷଣା କରାଯାଇଥିଲେ ମଧ୍ୟ ପୂର୍ବରୁ ମଧ୍ୟ ଏପରି ଅନେକ ଘଟଣା ସାମ୍ନାକୁ ଆସିଛି। ବାରମ୍ବାର ଏପରି ନିୟମ ଉଲ୍ଲଂଘନ ହେବାରୁ ସାଧାରଣରେ ଏବଂ ସେବାୟତମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଭବିଷ୍ୟତରେ ଏପରି ଘଟଣାକୁ ରୋକିବା ପାଇଁ ଶ୍ରୀମନ୍ଦିର ପରିସରରେ ତୁରନ୍ତ ‘ଆଣ୍ଟି-ଡ୍ରୋନ୍ ଟେକ୍ନୋଲୋଜି’ବ୍ୟାପକ ଭାବେ ସ୍ଥାପନ କରିବାକୁ ଭକ୍ତ ଓ ସଚେତନ ନାଗରିକମାନେ ଦାବି କରିଛନ୍ତି।