ଭୁବନେଶ୍ୱର: ଭୁବନେଶ୍ୱର ସ୍ଥିତ R&B ଡିଭିଜନ୍-୧ ର ଅଧୀକ୍ଷଣ ଯନ୍ତ୍ରୀ କାର୍ଯ୍ୟାଳୟର ୯.୨୪ କୋଟି ଟଙ୍କାର ସରକାରୀ ପାଣ୍ଠି ହେରଫେର ମାମଲାରେ ଓଡ଼ିଶା ଭିଜିଲାନ୍ସ ଆଉ ୩ ଜଣ ସରକାରୀ କର୍ମଚାରୀଙ୍କୁ ଗିରଫ କରିଛି। ଏଥିରେ ଜଣେ ଟ୍ରେଜେରୀ କର୍ମଚାରୀ ମଧ୍ୟ ସାମିଲ ଅଛନ୍ତି।
ଗିରଫ ହୋଇଥିବା ବ୍ୟକ୍ତିମାନେ ହେଲେ ଭୁବନେଶ୍ୱର ଜିଲ୍ଲା ଟ୍ରେଜେରୀ କାର୍ଯ୍ୟାଳୟର ବରିଷ୍ଠ ଆକାଉଣ୍ଟାଣ୍ଟ କୃଷ୍ଣ ଚନ୍ଦ୍ର ବେହେରା, ପୁରୀ R&B ଡିଭିଜନର ବରିଷ୍ଠ ସହାୟକ ବିଶ୍ୱନାଥ ଦାସ ଏବଂ ଭୁବନେଶ୍ୱର R&B ଡିଭିଜନ୍-୧ ର ପିଅନ କୁମୁଦ ସାହୁ। ଶନିବାର ଦିନ ଏହି ତିନିଜଣଙ୍କୁ ଭୁବନେଶ୍ୱର ସ୍ଥିତ ଭିଜିଲାନ୍ସ ସ୍ୱତନ୍ତ୍ର କୋର୍ଟରେ ହାଜର କରାଯାଇଛି।
R&B ଡିଭିଜନ୍-୧ କାର୍ଯ୍ୟାଳୟରେ ମୋଟ ୯,୨୪,୧୦,୧୯୩ ଟଙ୍କା ହେରଫେର ନେଇ ଭିଜିଲାନ୍ସ ପକ୍ଷରୁ ଦୁର୍ନୀତି ନିବାରଣ ଆଇନ, ୨୦୧୮ ଏବଂ ଭାରତୀୟ ନିୟାମକ ସଂହିତାର ବିଭିନ୍ନଧାରା ଅଧୀନରେ ମାମଲା ରୁଜୁ କରାଯାଇଛି।
ପୂର୍ବରୁ ଏହି ମାମଲାରେ ସେପ୍ଟେମ୍ବର ୨୭ ତାରିଖରେ ମୁଖ୍ୟ ଅଭିଯୁକ୍ତ ବନଲତା ମହାନ୍ତି (ସେକ୍ସନ୍ ଅଫିସର) ଏବଂ ବିଭୁଦତ୍ତ ନାୟକ (ଜୁନିୟର ଆସିଷ୍ଟାଣ୍ଟ) ଙ୍କ ସମେତ ୬ ଜଣଙ୍କୁ ଗିରଫ କରାଯାଇଥିଲା।
କୃଷ୍ଣ ଚନ୍ଦ୍ର ବେହେରା: ଜାଲ୍ ଏବଂ ପ୍ରତାରଣାପୂର୍ଣ୍ଣ ବିଲ୍ଗୁଡ଼ିକୁ ବିନା କୌଣସି ଆପତ୍ତିରେ ପାସ୍ କରାଇବା ପାଇଁ ବିଭୁଦତ୍ତ ନାୟକ ମାର୍ଚ୍ଚ ୨୦୨୫ ରୁ ଜୁଲାଇ ୨୦୨୬ ମଧ୍ୟରେ ୧୧ ଥରରେ ଫୋନ୍ପେ ଜରିଆରେ କୃଷ୍ଣ ଚନ୍ଦ୍ରଙ୍କୁ ୩.୯୦ ଲକ୍ଷ ଟଙ୍କା ଅନ୍ଲାଇନ୍ରେ ଟ୍ରାନ୍ସଫର୍ କରିଥିବା ତଦନ୍ତରୁ ଜଣାପଡ଼ିଛି।
ବିଶ୍ୱନାଥ ଦାସ: ପୂର୍ବରୁ ଏହି କାର୍ଯ୍ୟାଳୟରେ କାର୍ଯ୍ୟ କରିଥିବା ବିଶ୍ୱନାଥ ଦାସ ତାଙ୍କ ମାଆ ନୟନା ଦାସ, ନିଜର ଏବଂ ଜଣେ ସମ୍ପର୍କୀୟ କାହ୍ନୁ ଚନ୍ଦ୍ର ବେହେରାଙ୍କ ବ୍ୟାଙ୍କ ଆକାଉଣ୍ଟ୍ ନମ୍ବର ମୁଖ୍ୟ ଅଭିଯୁକ୍ତଙ୍କୁ ପ୍ରଦାନ କରିଥିଲେ। ଏହି ଆକାଉଣ୍ଟଗୁଡ଼ିକରେ ପ୍ରାୟ ୫୦ ଲକ୍ଷ, ୧୫ ଲକ୍ଷ ଏବଂ ୩୭ ଲକ୍ଷ ଟଙ୍କା ଜମା କରାଯାଇଥିଲା, ଯାହାକୁ ପରେ ନଗଦ ଟଙ୍କା ଆକାରରେ ଉଠାଯାଇଥିଲା।
କୁମୁଦ ସାହୁ: ପିଅନ କୁମୁଦ ସାହୁ ମଧ୍ୟ ତାଙ୍କ ପତ୍ନୀ ବିଜୁଳି ସାହୁଙ୍କ ବ୍ୟାଙ୍କ ଆକାଉଣ୍ଟ୍ ତଥ୍ୟ ଦେଇ ୧୧,୨୫,୧୨୦ ଟଙ୍କା ହାତେଇଥିବା ଅଭିଯୋଗ ହୋଇଛି। ଭିଜିଲାନ୍ସ ଏହି ଦୁର୍ନୀତିର ଗମ୍ଭୀରତାର ସହ ତଦନ୍ତ ଜାତି ରଖିଛି।
