ସୁବିଧା ପାଇବାକୁ ହେଲେ ବାଧ୍ୟତାମୂଳକ ‘ବାୟୋମେଟ୍ରିକ୍ ଆଧାର ଅଥେଣ୍ଟିକେସନ୍’: ଅକ୍ଟୋବର ୧ ରୁ ବଦଳିବ ଏଲପିଜି ସବସିଡି ନିୟମ

ନୂଆଦିଲ୍ଲୀ: ଭାରତରେ ଏଲପିଜି ରନ୍ଧନ ଗ୍ୟାସ୍ ଗ୍ରାହକଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଖବର। ଆସନ୍ତା ୨୦୨୬ ଅକ୍ଟୋବର ୧ ତାରିଖରୁ ସବସିଡିଯୁକ୍ତ ଗ୍ୟାସ୍ ସିଲିଣ୍ଡର ପାଇବା ପାଇଁ ଗ୍ରାହକମାନଙ୍କୁ ‘ବାୟୋମେଟ୍ରିକ୍ ଆଧାର ଅଥେଣ୍ଟିକେସନ୍’ କରିବା ବାଧ୍ୟତାମୂଳକ ହେବ। କେନ୍ଦ୍ର ସରକାରଙ୍କ ସୂଚନା ଅନୁଯାୟୀ, ପ୍ରକୃତ ଏବଂ ଯୋଗ୍ୟ ହିତାଧିକାରୀଙ୍କ ପାଖରେ ସବସିଡି ପହଞ୍ଚାଇବା ଏବଂ ଜାଲ୍ ସଂଯୋଗ ରୋକିବା ପାଇଁ ଏହି ନିୟମ ଲାଗୁ କରାଯାଉଛି।

ଅଥେଣ୍ଟିକେସନ୍ ନକଲେ କ’ଣ ହେବ?

ଗ୍ୟାସ୍ ମିଳିବ, ସବସିଡି ନୁହେଁ: ଯେଉଁ ଗ୍ରାହକମାନେ ଅକ୍ଟୋବର ୧ ସୁଦ୍ଧା ବାୟୋମେଟ୍ରିକ୍ ଆଧାର ଭେରିଫିକେସନ୍ କରିନଥିବେ, ସେମାନଙ୍କୁ ଏଲପିଜି ସିଲିଣ୍ଡର ମିଳିବାରେ କୌଣସି ବାଧା ସୃଷ୍ଟି ହେବ ନାହିଁ। ତେବେ ସେମାନଙ୍କୁ ସବସିଡିଯୁକ୍ତ ରିଆତି ଦର ବଦଳରେ ବଜାର ଦର (Market Price) ରେ ସିଲିଣ୍ଡର କିଣିବାକୁ ପଡ଼ିବ।

୮୯.୯% ଗ୍ରାହକଙ୍କ ପ୍ରକ୍ରିୟା ଶେଷ: ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟର ସେପ୍ଟେମ୍ବର ୧୯, ୨୦୨୬ ସୁଦ୍ଧା ତଥ୍ୟ ଅନୁଯାୟୀ, ଦେଶର ମୋଟ ୨୭.୪୩ କୋଟି (ପ୍ରାୟ ୮୯.୯ ପ୍ରତିଶତ) ଏଲପିଜି ଗ୍ରାହକ ନିଜର ବାୟୋମେଟ୍ରିକ୍ ଅଥେଣ୍ଟିକେସନ୍ ଶେଷ କରିସାରିଛନ୍ତି। ଏହି ଗ୍ରାହକମାନଙ୍କୁ ପୁଣିଥରେ ଏହି ପ୍ରକ୍ରିୟା କରିବାକୁ ପଡ଼ିବ ନାହିଁ।

କେଉଁଠାରେ ଓ କିପରି କରିବେ ଅଥେଣ୍ଟିକେସନ୍?
ଗ୍ରାହକମାନେ ସହଜରେ ୩ଟି ଉପାୟରେ ନିଜର ବାୟୋମେଟ୍ରିକ୍ ଅଥେଣ୍ଟିକେସନ୍ ଶେଷ କରିପାରିବେ:

ସିଲିଣ୍ଡର ଡେଲିଭରୀ ସମୟରେ: ଗ୍ୟାସ୍ ସିଲିଣ୍ଡର ଘରେ ପହଞ୍ଚାଇବାକୁ ଆସୁଥିବା ଡେଲିଭରୀ ବୟଙ୍କ ଜରିଆରେ।

ଗ୍ୟାସ୍ ଏଜେନ୍ସି/ଶୋ’ରୁମ୍‌ରେ: ନିଜର ସମ୍ପୃକ୍ତ ଏଲପିଜି ବିତରକ (Distributor) ଙ୍କ ଶୋ’ରୁମ୍‌କୁ ଯାଇ।

ମୋବାଇଲ୍ ଆପ୍‌ ମାଧ୍ୟମରେ: ତୈଳ କମ୍ପାନୀଗୁଡ଼ିକର ଅଫିସିଆଲ୍ ଆପ୍— ଇଣ୍ଡେନ୍ (Indane) ଗ୍ରାହକ IndianOil ONE, ଭାରତଗ୍ୟାସ୍ (Bharatgas) ଗ୍ରାହକ HelloBPCL ଏବଂ ଏଚ୍‌ପି ଗ୍ୟାସ୍ (HP Gas) ଗ୍ରାହକ HP PAY ଆପ୍ ବ୍ୟବହାର କରି ଘରେ ବସି ଭେରିଫିକେସନ୍ କରିପାରିବେ।

ଆବଶ୍ୟକୀୟ କାଗଜପତ୍ର/ତଥ୍ୟ:

ଆଧାର କାର୍ଡ (Aadhaar details)

ଲିଙ୍କ୍ ଥିବା ପଞ୍ଜୀକୃତ ମୋବାଇଲ୍ ନମ୍ବର (Registered Mobile Number)

ଏଲପିଜି ଗ୍ରାହକ ନମ୍ବର/ଆଇଡି (LPG Consumer ID)

ଫର୍ଜି ଓ ବାଣିଜ୍ୟିକ ବ୍ୟବହାର ରୋକିବା ପାଇଁ କେନ୍ଦ୍ର ସରକାର ଅକ୍ଟୋବର ୨୦୨୩ ରୁ ଏହି ଅଭିଯାନ ଆରମ୍ଭ କରିସାରିଛନ୍ତି। ଯେଉଁ ଗ୍ରାହକମାନେ ଏପର୍ଯ୍ୟନ୍ତ ଏହା କରିନାହାନ୍ତି, ସେମାନେ ତୁରନ୍ତ ଅଥେଣ୍ଟିକେସନ୍ ସମ୍ପୂର୍ଣ୍ଣ କରି ସବସିଡିର ଫାଇଦା ଜାରି ରଖିବାକୁ ପରାମର୍ଶ ଦିଆଯାଇଛି।