ନୂଆଦିଲ୍ଲୀ: ଭୋଟ୍ ତାଲିକା ସଂଶୋଧନକୁ ନେଇ କେନ୍ଦ୍ର ସରକାର ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ଆକ୍ରମଣ ଜୋରଦାର କରିଛନ୍ତି ଲୋକସଭାର ବିରୋଧୀଦଳ ନେତା ରାହୁଲ ଗାନ୍ଧୀ। ଶନିବାର ଦିନ ଏକ ଭିଡିଓ ବାର୍ତ୍ତା ଜରିଆରେ ସେ କହିଛନ୍ତି ଯେ ଜ୍ଞାନେଶ କୁମାର ଏବଂ ଏହି ସରକାର ଯିବେ ଏବଂ ଦେଶରେ ପୁନର୍ବାର ଗଣତନ୍ତ୍ର ପ୍ରତିଷ୍ଠା ହେବ।
ପାର୍ଲାମେଣ୍ଟର ସେଣ୍ଟ୍ରାଲ୍ ହଲ୍ରେ ‘ଇଣ୍ଡିଆ’ ମେଣ୍ଟର ସାଂସଦମାନଙ୍କୁ ସମ୍ବୋଧନ କରିଥିବା ଭାଷଣର ଏକ ଭିଡିଓ ସେୟାର କରି ରାହୁଲ ଗାନ୍ଧୀ ସୋସିଆଲ ମିଡିଆ ଏକ୍ସରେ ଏହି ମନ୍ତବ୍ୟ ଦେଇଛନ୍ତି।
ଦିଲ୍ଲୀର ଜନ୍ତର ମନ୍ତରରେ ‘କକ୍ରୋଚ୍ ଜନତା ପାର୍ଟି’ ପକ୍ଷରୁ ସିଇଓଙ୍କ ଇସ୍ତଫା ଦାବିରେ ହେବାକୁ ଥିବା ଆନ୍ଦୋଳନକୁ କଂଗ୍ରେସ ଦଳ ସିଧାସଳଖ ସମର୍ଥନ କରୁ ନଥିଲେ ମଧ୍ୟ ସମାଜବାଦୀ ପାର୍ଟି, ଆମ୍ ଆଦମୀ ପାର୍ଟି ଏବଂ ବାମପନ୍ଥୀ ଦଳଗୁଡ଼ିକ ଏହି ପ୍ରତିବାଦକୁ ସମର୍ଥନ ଜଣାଇଛନ୍ତି।
ଅନ୍ୟପଟେ, ବିଜେପିର ଜାତୀୟ ସଭାପତି ନୀତିନ ନବୀନ ବିରୋଧୀ ଦଳର ନେତାମାନଙ୍କୁ କଡ଼ା ସମାଲୋଚନା କରିଛନ୍ତି। ସେ ଅଭିଯୋଗ କରିଛନ୍ତି ଯେ ରାହୁଲ ଗାନ୍ଧୀ ଏବଂ ଅରବିନ୍ଦ କେଜ୍ରିୱାଲ୍ ‘ବିଦେଶୀ ମାଷ୍ଟ୍ରଙ୍କ ନିର୍ଦ୍ଦେଶରେ’ ଦେଶରେ ଅରାଜକତା ସୃଷ୍ଟି କରିବାକୁ ପ୍ରୟାସ କରୁଛନ୍ତି। ବିଶ୍ୱ ସଙ୍କଟ ସମୟରେ ମଧ୍ୟ ଭାରତର ଅଗ୍ରଗତିକୁ ଏହି ନେତାମାନେ ଗ୍ରହଣ କରିପାରୁନାହାନ୍ତି ବୋଲି ସେ କହିଛନ୍ତି।
ରାଜଧାନୀରେ ଆନ୍ଦୋଳନକୁ ଦୃଷ୍ଟିରେ ରଖି ଦିଲ୍ଲୀ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିବାବେଳେ ବିମାନବନ୍ଦରରୁ CJP ପ୍ରତିଷ୍ଠାତାଙ୍କୁ ମଧ୍ୟ ଅଟକ ରଖାଯାଇଛି।
