ଭୁବନେଶ୍ୱର: ବାତ୍ୟା ‘ଅର୍ଣ୍ଣବ’ ପ୍ରଭାବରେ ଦକ୍ଷିଣ ଓ ଉତ୍ତର ଓଡ଼ିଶାର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା ଯୋଗୁଁ ନଦୀଗୁଡ଼ିକର ଜଳସ୍ତର ଦ୍ରୁତଗତିରେ ବୃଦ୍ଧି ପାଇବାରେ ଲାଗିଛି। ବିଶେଷ କରି ବାଲେଶ୍ୱରର ଜଳକା ଏବଂ ଗଞ୍ଜାମର ରୁଷିକୂଲ୍ୟା ନଦୀ ନିଜ ନିଜର ବିପଦ ସଙ୍କେତ ଅତିକ୍ରମ କରିଥିବାରୁ ତଳିଆ ଅଞ୍ଚଳଗୁଡ଼ିକରେ ବନ୍ୟା ପରିସ୍ଥିତି ସୃଷ୍ଟି ହୋଇଛି।
ଜଳକା ନଦୀ (ବାଲେଶ୍ୱର): ବାଲେଶ୍ୱର ଜିଲ୍ଲା ବସ୍ତା ବ୍ଲକ୍ର ମାଥାନୀଠାରେ ଜଳକା ନଦୀର ବିପଦ ସଙ୍କେତ ୬.୫୦ ମିଟର ରହିଥିବା ବେଳେ ବର୍ତ୍ତମାନ ଏହା ୬.୫୮ ମିଟରରେ ପ୍ରବାହିତ ହେଉଛି। ଅର୍ଥାତ୍ ନଦୀର ଜଳସ୍ତର ବିପଦ ସଙ୍କେତଠାରୁ ୮ ସେଣ୍ଟିମିଟର ଉପରେ ରହିଛି।
ରୁଷିକୂଲ୍ୟା ନଦୀ (ଗଞ୍ଜାମ): ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ନିକଟରେ ରୁଷିକୂଲ୍ୟା ନଦୀର ବିପଦ ସଙ୍କେତ ୧୬.୮୩୫ ମିଟର ଥିବା ବେଳେ ଜଳସ୍ତର ୧୮.୨୮୦ ମିଟରରେ ପହଞ୍ଚିଛି। ଏହି ନଦୀ ବିପଦ ସଙ୍କେତଠାରୁ ପ୍ରାୟ ୧.୪୪୫ ମିଟର ଉପରେ ପ୍ରବାହିତ ହେଉଛି, ଯାହା ଗମ୍ଭୀର ବନ୍ୟାର ଆଶଙ୍କା ସୃଷ୍ଟି କରିଛି।
ଗଞ୍ଜାମ ଜିଲ୍ଲା ସବୁଠାରୁ ଅଧିକ ପ୍ରଭାବିତ:ରାଜସ୍ୱ ଓ ବିପର୍ଯ୍ୟୟ ପ୍ରଶମନ ମନ୍ତ୍ରୀ ସୁରେଶ ପୂଜାରୀ ଗୁରୁବାର ସୂଚନା ଦେଇଛନ୍ତି ଯେ, ବାତ୍ୟା ଓ ବନ୍ୟା ଯୋଗୁଁ କେବଳ ଗଞ୍ଜାମ ଜିଲ୍ଲାରେ ପ୍ରାୟ ୪୨,୫୦୦ ଲୋକ ପ୍ରଭାବିତ ହୋଇଛନ୍ତି। ବନ୍ୟା ଜଳରେ ଫସି ରହିଥିବା ଲୋକଙ୍କୁ ସୁରକ୍ଷିତ ସ୍ଥାନାନ୍ତର ପାଇଁ ୧୬ଟି ସରକାରୀ ଡଙ୍ଗା ଏବଂ ୨୫ଟି ବେସରକାରୀ ଡଙ୍ଗା ମୁତୟନ କରାଯାଇଛି।
ନଦୀକୂଳିଆ ଏବଂ ତଳିଆ ଅଞ୍ଚଳଗୁଡ଼ିକରେ ଜଳପ୍ଲାବନ ହେବାର ଆଶଙ୍କା ଥିବାରୁ ଜିଲ୍ଲା ପ୍ରଶାସନ ପକ୍ଷରୁ ସ୍ଥାନୀୟ ବାସିନ୍ଦାଙ୍କୁ ଆଲର୍ଟରେ ରଖାଯାଇଛି ଏବଂ ସ୍ଥିତି ଉପରେ ସରକାର ନିରନ୍ତର ନଜର ରଖିଛନ୍ତି।
