ଶପଥ ନେଲେ ନୂଆ ରାଜ୍ୟପାଳ, ଜାଣନ୍ତୁ ତାଙ୍କ ମୋଟ ସମ୍ପତ୍ତି

ଭୁବନେଶ୍ୱର: ଓଡ଼ିଶାର ନୂତନ ରାଜ୍ୟପାଳ ଭାବେ ବ୍ରଜ ମୋହନ ରାମ ପଦ ଓ ଗୋପନୀୟତାର ଶପଥ ଗ୍ରହଣ କରିଛନ୍ତି। ଲୋକଭବନର ନବନିର୍ମିତ ଅଭିଷେକ ହଲ୍‌ରେ ଆୟୋଜିତ ଏକ ଭବ୍ଯ ସମାରୋହରେ ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ହରିଶ ଟଣ୍ଡନ ତାଙ୍କୁ ଶପଥ ପାଠ କରାଇଛନ୍ତି।

ଭବ୍ୟ ଶପଥ ଗ୍ରହଣ ସମାରୋହ:ଗତକାଲି (ରବିବାର) ପୂର୍ବାହ୍ନ ୧୧ଟାରେ ଅନୁଷ୍ଠିତ ଏହି ସମାରୋହରେ ରାଜ୍ୟ ତଥା ରାଜ୍ୟ ବାହାରର ୩୦୦ରୁ ଅଧିକ ବିଶିଷ୍ଟ ଅତିଥି ଯୋଗଦେଇଥିଲେ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ମନ୍ତ୍ରୀପରିଷଦର ସଦସ୍ୟ, ସାଂସଦ, ବିଧାୟକ ଏବଂ ବରିଷ୍ଠ ପ୍ରଶାସନିକ ଓ ପୋଲିସ ଅଧିକାରୀମାନେ ଉପସ୍ଥିତ ଥିଲେ। ଶପଥ ଗ୍ରହଣ ପୂର୍ବରୁ ଓ ପରେ ନୂଆ ରାଜ୍ୟପାଳଙ୍କୁ ସଶସ୍ତ୍ର ବାହିନୀ ପକ୍ଷରୁ ‘ଗାର୍ଡ ଅଫ୍ ଅନର୍’ ପ୍ରଦାନ କରାଯାଇଥିଲା। ସୁରକ୍ଷା ଦୃଷ୍ଟିରୁ ଲୋକସେବା ଭବନ ଓ ରାଜଭବନ ଆଖପାଖରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା।

ବ୍ରଜ ମୋହନ ରାମଙ୍କ ନେଟ୍‌ୱର୍ଥ ଓ ରାଜନୈତିକ ପୃଷ୍ଠଭୂମି:ରାଜ୍ୟପାଳ ଭାବେ ଦାୟିତ୍ୱ ଗ୍ରହଣ କରିଥିବା ବ୍ରଜ ମୋହନ ରାମ ହେଉଛନ୍ତି ଝାଡ଼ଖଣ୍ଡର ପଲାମୁ ଅଞ୍ଚଳର ଜଣେ ଅଭିଜ୍ଞ ରାଜନେତା। ସେ ୧୯୯୧ରୁ ୧୯୯୫ ପର୍ଯ୍ୟନ୍ତ ଅବିଭକ୍ତ ବିହାରର ବିଧାୟକ ଏବଂ ପରେ ୧୯୯୬, ୧୯୯୮ ଓ ୧୯୯୯ରେ ଲୋକସଭା ସାଂସଦ ଭାବେ ନିର୍ବାଚିତ ହୋଇଥିଲେ।

ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍‌ (ADR) ର ତଥ୍ୟ ଅନୁଯାୟୀ, ୨୦୧୪ ଝାଡ଼ଖଣ୍ଡ ନିର୍ବାଚନ ସମୟରେ ତାଙ୍କ ଦାଖଲକୃତ ସତ୍ୟପାଠରେ ମୋଟ ସମ୍ପତ୍ତିର ମୂଲ୍ୟ ପ୍ରାୟ ୮୨ ଲକ୍ଷ 86 ହଜାର ୯୮୨ ଟଙ୍କା (ପ୍ରାୟ ୮୨.୮୭ ଲକ୍ଷ ଟଙ୍କା) ବୋଲି ଦର୍ଶାଯାଇଥିଲା। ତେବେ ଏହା ଏକ ପୁରୁଣା ତଥ୍ୟ ହୋଇଥିବାରୁ ଏହାକୁ ତାଙ୍କର ବର୍ତ୍ତମାନର ମୋଟ ନେଟ୍‌ୱର୍ଥ ବୋଲି ଧରିନିଆଯାଇପାରିବ ନାହିଁ। ନୂତନ ସତ୍ୟପାଠ କିମ୍ବା ଅଦ୍ୟତନ ଆର୍ଥିକ ତଥ୍ୟ ଆସିବା ପରେ ହିଁ ସଠିକ୍ ଆକଳନ ଜଣାପଡ଼ିବ।