ନୂଆଦିଲ୍ଲୀ: ଉତ୍ତର ଆରବ ସାଗରରେ ମଙ୍ଗଳବାର ସନ୍ଧ୍ୟାରେ ଭାରତୀୟ ନୌସେନାର ଏକ ଯୁଦ୍ଧପୋତ ସହ ପାକିସ୍ତାନ ନୌସେନାର ଜାହାଜ ମୁହାଁମୁହିଁ ଧକ୍କା ହୋଇଛି। ସାଧାରଣ ନୀରିକ୍ଷଣ ମିଶନରେ ଥିବା ଭାରତୀୟ ଯୁଦ୍ଧପୋତ ଆଡ଼କୁ ପାକିସ୍ତାନୀ ଜାହାଜଟି ଅତ୍ୟନ୍ତ ଦ୍ରୁତ ବେଗରେ ଆସି ବିପଜ୍ଜନକ ଭାବେ ଗତିପଥ ବଦଳାଇବା ଯୋଗୁଁ ଏହି ଦୁର୍ଘଟଣା ଘଟିଛି।
ଅନ୍ତର୍ଜାତୀୟ ଜଳଭାଗରେ ପାକିସ୍ତାନୀ ପକ୍ଷର ଏହି ଅସୁରକ୍ଷିତ ଆଚରଣକୁ ନେଇ ଭାରତୀୟ ନୌସେନା ଓ ବୈଦେଶିକ ମନ୍ତ୍ରଣାଳୟ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ଏହି ଘଟଣାରେ ଦୁଇପକ୍ଷର କୌଣସି ବଡ଼ ଧରଣର କ୍ଷତି କିମ୍ବା ହତାହତ ହୋଇନାହାନ୍ତି।
ମାତ୍ର ସମୁଦ୍ର ମଧ୍ୟରେ ଏଭଳି ଆକ୍ରମଣାତ୍ମକ ମନୋଭାବକୁ ନେଇ କେନ୍ଦ୍ର ସରକାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ବୁଧବାର ସକାଳେ ନୂଆଦିଲ୍ଲୀସ୍ଥିତ ବୈଦେଶିକ ମନ୍ତ୍ରଣାଳୟ ପକ୍ଷରୁ ପାକିସ୍ତାନର କାର୍ଯ୍ୟକାରୀ ରାଷ୍ଟ୍ରଦୂତଙ୍କୁ ସମନ୍ କରାଯାଇ ଦୃଢ଼ ବିରୋଧ ଦର୍ଶାଯାଇଛି।
ଦ୍ୱିପାକ୍ଷିକ ଚୁକ୍ତିର ଉଲ୍ଲଂଘନ: ଏହି ଅପରାଧିକ ମନୋଭାବ ୧୯୯୧ ଏପ୍ରିଲରେ ଦୁଇ ଦେଶ ମଧ୍ୟରେ ସ୍ୱାକ୍ଷରିତ ହୋଇଥିବା ସାମରିକ ଅଭ୍ୟାସ ଓ ଗତିବିଧି ସମ୍ପର୍କିତ ଚୁକ୍ତିର ‘ଧାରା ୧୦’ର ସୀଧାସଳଖ ଉଲ୍ଲଂଘନ।
ଭାରତର କଡ଼ା ଚେତାବନୀ: ଆଗାମୀ ଦିନରେ ନୌସେନା ୟୁନିଟ୍ଗୁଡ଼ିକ ସତର୍କତା ଅବଲମ୍ବନ କରିବା ସହ ଦ୍ୱିପାକ୍ଷିକ ନିୟମାବଳୀକୁ ପାଳନ କରିବାକୁ ଭାରତ ଚେତାବନୀ ଦେଇଛି।
ଇସଲାମାବାଦରେ ପ୍ରତିବାଦ: ନୂଆଦିଲ୍ଲୀ ବ୍ୟତୀତ ଇସଲାମାବାଦସ୍ଥିତ ଭାରତୀୟ ହାଇକମିଶନଙ୍କ ମାଧ୍ୟମରେ ମଧ୍ୟ ପାକିସ୍ତାନ ବୈଦେଶିକ ମନ୍ତ୍ରଣାଳୟ ନିକଟରେ ଆନୁଷ୍ଠାନିକ ଭାବେ କଡ଼ା ପ୍ରତିବାଦ ପତ୍ର ଦାଖଲ କରାଯାଇଛି।
