ନୂଆଦିଲ୍ଲୀ: ବଲିଉଡ୍ ଅଭିନେତା ଟାଇଗର ଶ୍ରଫ୍ଙ୍କ କାର୍ ଉପରେ ହୋଇଥିବା ଗୁଳିମାଡ଼ ଘଟଣାର ତଦନ୍ତ ବେଳେ ଏକ ବଡ଼ ଖୁଲାସା ହୋଇଛି। ଅସ୍ତ୍ରଶସ୍ତ୍ର ଯୋଗାଇବା ଏବଂ ଆକ୍ରମଣକାରୀଙ୍କୁ ପଳାଇବାରେ ସହଯୋଗ କରିଥିବା ଅଭିଯୋଗରେ ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ ଅକ୍ଟୋବର ୨୦ ତାରିଖରେ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ହୋଇଥିବା ବ୍ୟକ୍ତିମାନେ ହେଲେ ହରିଆଣା ସୋନିପତର କୁନାଲ (୨୧) ଓ ସୁମିତ (୧୯), ଉତ୍ତରପ୍ରଦେଶ ସୀତାପୁରର ରାଧା (୨୩) ଏବଂ ଆଜମଗଡ଼ର ବବିତା (୨୩)।
ପୋଲିସର ସୂଚନା ଅନୁଯାୟୀ, ଜେଲରୁ ଜାମିନରେ ମୁକ୍ତ ହୋଇଥିବା କୁନାଲ ଏନକ୍ରିପ୍ଟେଡ୍ ମେସେଜିଂ ଆପ୍ ଜରିଆରେ ଅନିଲ ପଣ୍ଡିତଙ୍କ ସଂସ୍ପର୍ଶରେ ଆସିଥିଲା। ଅନିଲର ନିର୍ଦ୍ଦେଶ କ୍ରମେ କୁନାଲ ଓ ସୁମିତ ଅମୃତସରରୁ ଏକ ପିସ୍ତଲ ଏବଂ ୨୦ଟି କାର୍ଟ୍ରିଜ୍ ଆଣିଥିଲେ। ଏହାପରେ କୁନାଲ ରାଧା ଏବଂ ବବିତାଙ୍କୁ ଏହି ବନ୍ଧୁକ ମୁମ୍ବାଇ ପହଞ୍ଚାଇବା ପାଇଁ ବ୍ୟବହାର କରିଥିଲା।
ଅକ୍ଟୋବର ୧୫ ତାରିଖରେ ରାଧାଙ୍କ ବ୍ୟାଗ୍ ଭିତରେ ବନ୍ଧୁକ ରଖି ସେମାନଙ୍କୁ ନୂଆଦିଲ୍ଲୀ ରେଳଷ୍ଟେସନ ପଠାଯାଇଥିଲା। ଅକ୍ଟୋବର ୧୭ ତାରିଖରେ ରାଧା ଓ ବବିତା ଦାଦରରେ ପହଞ୍ଚି ଏକ ହୋଟେଲରେ ରହିଥିଲେ, ଯେଉଁଠାରୁ ଜଣେ ନାବାଳକ ସେହି ବ୍ୟାଗ୍ ସଂଗ୍ରହ କରିଥିଲା। ଏହାପରେ ଅକ୍ଟୋବର ୧୮ ତାରିଖରେ ଟାଇଗର ଶ୍ରଫ୍ଙ୍କ କାର୍ ଉପରେ ଗୁଳିମାଡ଼ ହୋଇଥିଲା।
ଆକ୍ରମଣ ପରେ ଅଭିଯୁକ୍ତମାନେ ସୁରଟ, କୋଟା ଦେଇ ଦିଲ୍ଲୀ ହୋଇ ନେପାଳ ପଳାଇବାକୁ ଯୋଜନା କରିଥିଲେ। ମୁମ୍ବାଇ ପୋଲିସ ପୂର୍ବରୁ କୋଟାରୁ ତିନିଜଣଙ୍କୁ ଗିରଫ କରିଥିବାବେଳେ, ବର୍ତ୍ତମାନ ଦିଲ୍ଲୀ ପୋଲିସ ଏହି ୪ ଜଣ ସହଯୋଗୀଙ୍କୁ କାବୁ କରିଛି। ମାମଲାର ଅଧିକ ତଦନ୍ତ ଜାରି ରହିଛି।
