୨,୦୦୦ତମ ଏରୋ-ଇଞ୍ଜିନ୍ ଡେଲିଭରି, ବଢ଼ିବ “ଶକ୍ତି ଇଞ୍ଜିନ୍” ଉତ୍ପାଦନ

ଓଡ଼ିଶା: କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆସନ୍ତାକାଲି ଓଡ଼ିଶା ଗସ୍ତରେ ଆସୁଛନ୍ତି। କୋରାପୁଟ ଜିଲ୍ଲା ସୁନାବେଡ଼ାସ୍ଥିତ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL)ର ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ସେ ଯୋଗଦେବେ। ଏହି ଅବସରରେ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ ପକ୍ଷରୁ ନିର୍ମିତ ୨,୦୦୦ତମ ଏରୋ-ଇଞ୍ଜିନର ହସ୍ତାନ୍ତର କରାଯିବ। ଦେଶର ସାମରିକ ଓ ଏରୋସ୍ପେସ୍ କ୍ଷେତ୍ରରେ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL) କୋରାପୁଟ ଡିଭିଜନ୍ ବିଗତ ୬ ଦଶନ୍ଧି ଧରି ପ୍ରମୁଖ ଭୂମିକା ତୁଲାଇ ଆସୁଛି। ଏହି ଗସ୍ତ ସମୟରେ ‘ଶକ୍ତି ଇଞ୍ଜିନ୍’ (Shakti Engine) ନିର୍ମାଣ ପାଇଁ ଦ୍ୱିତୀୟ ଉତ୍ପାଦନ ଲାଇନ ସ୍ଥାପନ ନେଇ ମଧ୍ୟ ପ୍ରକ୍ରିୟା ଆରମ୍ଭ ହେବ। ଏହି ନୂତନ ପ୍ରକଳ୍ପ ପାଇଁ ପ୍ରାୟ ୨୧୮ କୋଟି ଟଙ୍କାର ପୁଞ୍ଜି ନିବେଶ କରାଯାଉଛି।

ଏହି ଅତିରିକ୍ତ ଉତ୍ପାଦନ କ୍ଷମତା ଦ୍ୱାରା ‘ଧ୍ରୁବ’ (Dhruv) ଏବଂ ‘ପ୍ରଚଣ୍ଡ’ (Prachand) ଭଳି ସ୍ୱଦେଶୀ ହେଲିକପ୍ଟର ପାଇଁ ଆବଶ୍ୟକ ଇଞ୍ଜିନ ଯୋଗାଣ ସହଜ ହୋଇପାରିବ। ଫଳରେ ଭାରତୀୟ ସେନାର ଆବଶ୍ୟକତା ଆହୁରି ଦ୍ରୁତ ଗତିରେ ପୂରଣ ହେବ। ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସମେତ କେନ୍ଦ୍ର ପ୍ରତିରକ୍ଷା ମନ୍ତ୍ରଣାଳୟ ଓ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL) ର ବହୁ ବରିଷ୍ଠ ଅଧିକାରୀ ଉପସ୍ଥିତ ରହିବେ। ପ୍ରତିରକ୍ଷା କ୍ଷେତ୍ରରେ ଭାରତର ଆତ୍ମନିର୍ଭରଶୀଳତା ଦୃଷ୍ଟିରୁ ଏହି ଗସ୍ତକୁ ବେଶ୍ ଗୁରୁତ୍ୱପୂର୍ଣ୍ଣ ବୋଲି ଆଶା କରାଯାଉଛି ।