ଓଡ଼ିଶା ଡିଜିପି ନିଯୁକ୍ତି ମାମଲା: ସୁପ୍ରିମକୋର୍ଟରେ ଶୁଣାଣି ସେପ୍ଟେମ୍ବର ୨୨କୁ ଘୁଞ୍ଚିଲା

ନୂଆଦିଲ୍ଲୀ/ଭୁବନେଶ୍ୱର: ଓଡ଼ିଶା ପୋଲିସ ମହାନିର୍ଦ୍ଦେଶକ (ଡିଜିପି) ନିଯୁକ୍ତି ମାମଲାର ଶୁଣାଣିକୁ ସୁପ୍ରିମକୋର୍ଟ ଆସନ୍ତା ସେପ୍ଟେମ୍ବର ୨୨ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦେଇଛନ୍ତି। ଶୁଣାଣି ସମୟରେ ରାଜ୍ୟ ସରକାରଙ୍କ ପକ୍ଷ ରଖି ଆଡଭୋକେଟ୍ ଜେନେରାଲ୍ (AG) ପୀତାମ୍ବର ଆଚାର୍ଯ୍ୟ କୋର୍ଟଙ୍କୁ ଜଣାଇଥିଲେ ଯେ, ଡିଜିପି ଚୟନ ପ୍ରକ୍ରିୟାରେ କୌଣସି ପ୍ରକାର ଅନିୟମିତତା ହୋଇନାହିଁ।

ବର୍ତ୍ତମାନ ରାଜ୍ୟ ପୋଲିସ ପ୍ରଶାସନ କାମଚଳା ଡିଜି ବିନୟତୋଷ ମିଶ୍ରଙ୍କ ପରିଚାଳନାରେ ଚାଲୁଥିବାରୁ ଏହି ମାମଲାର ତୁରନ୍ତ ଶୁଣାଣି କରିବାକୁ ଏଜି ସର୍ବୋଚ୍ଚ ଅଦାଲତଙ୍କୁ ନିବେଦନ କରିଥିଲେ।

ସୂଚନାଯୋଗ୍ୟ ଯେ, ଡିଜିପି ଚୟନ ପାଇଁ ଓଡ଼ିଶା ସରକାର ସଂଘୀୟ ଲୋକସେବା ଆୟୋଗ (UPSC) ନିକଟକୁ ପଠାଇଥିବା ବରିଷ୍ଠ ଆଇପିଏସ୍ (IPS) ଅଧିକାରୀଙ୍କ ତାଲିକାକୁ ନେଇ ଆଇନଗତ ପ୍ରଶ୍ନ ଉଠିଛି।

ଡିଜିପି ନିଯୁକ୍ତି କ୍ଷେତ୍ରରେ ସୁପ୍ରିମକୋର୍ଟଙ୍କ ଐତିହାସିକ ‘ପ୍ରକାଶ ସିଂହ ମାମଲା’ର ଦିଗଦର୍ଶନ ଓ ନିୟମାବଳୀକୁ ସଠିକ୍ ଭାବେ ଅନୁସରଣ କରାଯାଇ ନଥିବା ଅଭିଯୋଗ କରି କୋର୍ଟରେ ପିଟିସନ୍ ଦାଖଲ କରାଯାଇଛି।

ଅଭିଯୋଗ ଅନୁଯାୟୀ, ପ୍ରଥମ ପର୍ଯ୍ୟାୟରେ ରାଜ୍ୟ ସରକାର UPSC ନିକଟକୁ କେବଳ ୩ ଜଣ ଡିଜି-ରାଙ୍କ ଅଧିକାରୀଙ୍କ ନାମ ପଠାଇଥିଲେ। ମାତ୍ର ପରବର୍ତ୍ତୀ ସମୟରେ ଏହି ତାଲିକାରେ ଅନ୍ୟ ଅଧିକାରୀଙ୍କ ନାମ ସାମିଲ କରାଯିବାକୁ ନେଇ ଆପତ୍ତି ପ୍ରକାଶ ପାଇଛି। ଏହି ବିବାଦୀୟ ପ୍ରସଙ୍ଗ ଉପରେ ସୁପ୍ରିମକୋର୍ଟ ଆସନ୍ତା ୨୨ ତାରିଖରେ ପରବର୍ତ୍ତୀ ଶୁଣାଣି କରିବେ।