ନୂଆଦିଲ୍ଲୀ: ଭୀଷଣ ବାତ୍ୟା ‘ମୁରାସୁ’ ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ସ୍ଥଳଭାଗ ଛୁଇଁବା ପାଇଁ ମାଡ଼ି ଆସୁଥିବା ବେଳେ, ଏହାର ଅସାଧାରଣ ଏବଂ ଆକର୍ଷଣୀୟ ନାମକୁ ନେଇ ସାଧାରଣରେ ବ୍ୟାପକ ସୌତୁକ ସୃଷ୍ଟି ହୋଇଛି। ଏହି ନାମଟି କୌଣସି ଆକସ୍ମିକ ଭାବେ ଦିଆଯାଇ ନାହିଁ, ବରଂ ବିପର୍ଯ୍ୟୟ ପରିଚାଳନା ଏବଂ ଆଗୁଆ ସୂଚନା ଦେବା ପାଇଁ ଆନ୍ତର୍ଜାତୀୟସ୍ତରରେ ନିର୍ଦ୍ଧାରିତ ଏକ ସ୍ୱତନ୍ତ୍ର ନାମକରଣ ପ୍ରକ୍ରିୟାର ଅଂଶବିଶେଷ।
‘ମୁରାସୁ’ ନାମଟି ଭାରତ ଦ୍ୱାରା ପ୍ରସ୍ତାବିତ କରାଯାଇଥିଲା। ଏହା ଏକ ତାମିଲ ଶବ୍ଦରୁ ଆସିଛି, ଯାହାର ଅର୍ଥ ହେଉଛି ପାରମ୍ପରିକ ବୃହତ୍ ଢୋଲ କିମ୍ବା ନଗଡ଼ା। ପ୍ରାଚୀନ କାଳରେ ଉତ୍ସବ, ଯୁଦ୍ଧ ଏବଂ ଜନସାଧାରଣଙ୍କୁ କୌଣସି ବିପଦ ବିଷୟରେ ସଜାଗ ଓ ସାବଧାନ କରାଇବା ପାଇଁ ଏହି ଢୋଲ ବଜାଯାଉଥିଲା।
ବାତ୍ୟା ‘ମୁରାସୁ’ ଆନ୍ଧ୍ର, ତାମିଲନାଡୁ ଏବଂ ଓଡ଼ିଶା ପାଇଁ ଆଗୁଆ ଚେତାବନୀ ଓ ବିପଦ ସୃଷ୍ଟି କରିଥିବାରୁ, ଏହାର ନାମର ଅର୍ଥ ସହିତ ସମ୍ପ୍ରତି ସ୍ଥିତିର ଏକ ରୋଚକ ସାଦୃଶ୍ୟ ଦେଖିବାକୁ ମିଳିଛି।
ଉତ୍ତର ଭାରତୀୟ ମହାସାଗର ଆଞ୍ଚଳିକ ପାଣିପାଗ ପରିସରଭୁକ୍ତ ୧୩ଟି ଦେଶ ମିଳିତ ଭାବେ ପ୍ରତ୍ୟେକ ୧୩ଟି ଲେଖାଏଁ ନାମ ପ୍ରଦାନ କରିଛନ୍ତି। ବିଶ୍ୱ ପାଣିପାଗ ସଂଗଠନ ଏବଂ UN-ESCAP ର ନିୟମାବଳୀ ଅନୁଯାୟୀ ଏକ ୧୬୯ଟି ନାମର ବୈଧ ତାଲିକା ପ୍ରସ୍ତୁତ କରାଯାଇଛି।
ଗତ ଅକ୍ଟୋବର ଶେଷରେ ଆନ୍ଧ୍ର ଉପକୂଳ ଛୁଇଁଥିବା ବାତ୍ୟା ‘ଅର୍ଣ୍ଣବ’ ନାମଟି ବାଂଲାଦେଶ ଦ୍ୱାରା ଦିଆଯାଇଥିଲା। ‘ଅର୍ଣ୍ଣବ’ ପରେ ବର୍ତ୍ତମାନ ଭାରତର ‘ମୁରାସୁ’ ବ୍ୟବହୃତ ହୋଇଛି। ଏହି ବାତ୍ୟା ପରେ ପରବର୍ତ୍ତୀ ସୃଷ୍ଟି ହେବାକୁ ଥିବା ସାମୁଦ୍ରିକ ଝଡ଼ର ନାମ ଇରାନ ଦ୍ୱାରା ପ୍ରସ୍ତାବିତ ‘ଅକଭାନ୍’ ରଖାଯିବ।
ଭାରତୀୟ ପାଣିପାଗ ବିଭାଗର ନିୟମ ଅନୁଯାୟୀ, ଯେତେବେଳେ କୌଣସି ପାଣିପାଗ ବ୍ୟବସ୍ଥା ଘଣ୍ଟାପ୍ରତି ଅତିକମରେ ୬୨ କିମି ବେଗରେ ପବନ ବହିବା ସହ ‘ସାମୁଦ୍ରିକ ଝଡ଼’ର ରୂପ ନିଏ, ସେତେବେଳେ କ୍ରମାନୁସାରେ ତାଲିକାରୁ ନାମ ଚୟନ କରାଯାଏ। ଥରେ ନାମକରଣ ହେବା ପରେ, ସେହି ବାତ୍ୟାର ସମଗ୍ର କାର୍ଯ୍ୟକାଳ ମଧ୍ୟରେ ତାହା ସେହି ନାମରେ ହିଁ ପରିଚିତ ହୋଇଥାଏ।
