ଭୁବନେଶ୍ଵର: ନବରାତ୍ରୀର ୯ ଦିନିଆ ବ୍ରତ ସମୟରେ ପ୍ରତିଦିନ କିଛି ଭିନ୍ନ ଏବଂ ସ୍ୱାଦିଷ୍ଟ ଖାଇବାକୁ ଇଚ୍ଛା ହୋଇଥାଏ, ଯାହା ଶରୀରକୁ ଶକ୍ତି ଦେବା ସହିତ ପେଟକୁ ମଧ୍ୟ ଦୀର୍ଘ ସମୟ ପର୍ଯ୍ୟନ୍ତ ଭରି ରଖିଥାଏ। ଏଥିପାଇଁ ସାବୁଦାନା ଖିଚଡ଼ି ଏକ ଶ୍ରେଷ୍ଠ ବିକଳ୍ପ। କିନ୍ତୁ ଅନେକ ସମୟରେ ସଠିକ୍ ଉପାୟ ଅଭାବରୁ ସାବୁଦାନା ଖିଚଡ଼ି ଅଧିକ ଚିପଚିପା ହୋଇଯାଏ। ତେବେ ଆସନ୍ତୁ ଜାଣିବା ଏହାକୁ କିପରି ସମ୍ପୂର୍ଣ୍ଣ ଖୁଲା-ଖୁଲା ଏବଂ ସୁଆଦିଆ ପ୍ରସ୍ତୁତ କରାଯିବ।
ଆବଶ୍ୟକୀୟ ସାମଗ୍ରୀ:
ସାବୁଦାନା – ୧ କପ୍
ସିଝା ଆଳୁ – ୧ ରୁ ୨ଟି
ଚିନାବାଦାମ – ଅଧା କପ୍
କଞ୍ଚାଲଙ୍କା – ୧ ରୁ ୨ଟି
ଜିରା – ଅଧା ଚାମଚ
ଲୁଣ – ସ୍ୱାଦ ଅନୁଯାୟୀ
ଘିଅ – ୧ ରୁ ୨ ବଡ଼ ଚାମଚ
ଲେମ୍ବୁ ରସ – ୧ ସାନ ଚାମଚ
କଟା ଧନିଆ ପତ୍ର
ପ୍ରସ୍ତୁତି ପ୍ରଣାଳୀ:
୧. ସାବୁଦାନା ଧୋଇବା ଓ ଭିଜାଇବା: ଖିଚଡ଼ିକୁ ଚିପଚିପା ହେବାରୁ ରକ୍ଷା କରିବା ପାଇଁ ସାବୁଦାନାକୁ ୨-୩ ଥର ପାଣିରେ ଭଲଭାବେ ଧୋଇ ଦିଅନ୍ତୁ, ଯାହାଫଳରେ ଅତିରିକ୍ତ ଷ୍ଟାର୍ଚ୍ଚ ବାହାରିଯିବ। ଏହାପରେ ଏଥିରେ ଆବଶ୍ୟକ ମୁତାବକ ପାଣି ଦେଇ ୪ ରୁ ୬ ଘଣ୍ଟା ପର୍ଯ୍ୟନ୍ତ ଭିଜାଇ ରଖନ୍ତୁ।
୨. ଆଙ୍ଗୁଠି ଚାପିଲେ ଯଦି ଏହା ସହଜରେ ଦଳି ହୋଇଯାଏ, ତେବେ ଏହା ସମ୍ପୂର୍ଣ୍ଣ ଭିଜିଯାଇଛି ବୋଲି ଜାଣିବେ। ଏହାପରେ ପାଣି ଛାଣି ଏହାକୁ କିଛି ସମୟ ଛଣାରେ ରଖନ୍ତୁ।
୩. ଛୁଙ୍କ ଦେବା ପ୍ରକ୍ରିୟା: ଏକ କଡେଇରେ ଚିନାବାଦାମକୁ ଭାଜି ଅଲଗା ରଖନ୍ତୁ। ଏବେ ଘିଅ ଗରମ କରି ଜିରା, କଞ୍ଚା ଲଙ୍କା ଏବଂ ସିଝା ଆଳୁ ଖଣ୍ଡ ପକାଇ ହାଲୁକା ଭାଜନ୍ତୁ।
୪. ଏହାପରେ ଭିଜାଯାଇଥିବା ସାବୁଦାନା, ଭାଜିଥିବା ଚିନାବାଦାମ ଏବଂ ଲୁଣ ପକାଇ ମଧ୍ୟମ ଆଞ୍ଚରେ ହାଲୁକା ହାତରେ ଚଲାନ୍ତୁ।
୫. ସାବୁଦାନା ଦାନାଗୁଡ଼ିକ ସ୍ୱଚ୍ଛ ଦେଖାଗଲେ ଗ୍ୟାସ୍ ବନ୍ଦ କରନ୍ତୁ। ଶେଷରେ ଲେମ୍ବୁ ରସ ଏବଂ ଧନିଆ ପତ୍ର ପକାଇ ପରିବେଷଣ କରନ୍ତୁ।
ତେବେ କହିରଖୁଛୁ ଯେ, ଚିନାବାଦାମକୁ ଦରଦରା ପିସି ପକାଇଲେ ଏହା ସାବୁଦାନାର ଅତିରିକ୍ତ ଆର୍ଦ୍ରତାକୁ ଶୋଷିନେଇ ଖିଚଡ଼ିକୁ ଆହୁରି ସ୍ୱାଦିଷ୍ଟ ଓ ଖିଲା-ଖିଲା କରିଥାଏ।
