ଗାନ୍ଧୀନଗର: ଗୁଜୁରାଟର ଏକତା ନଗର (କେୱଡ଼ିଆ) ସ୍ଥିତ ‘ଷ୍ଟାଚ୍ୟୁ ଅଫ୍ ୟୁନିଟି’ ନିକଟରେ ଅତ୍ୟନ୍ତ ଆଡ଼ମ୍ବରପୂର୍ଣ୍ଣ ପରିବେଶରେ ୭୨ତମ ଜାତୀୟ ଚଳଚ୍ଚିତ୍ର ପୁରସ୍କାର (72nd National Film Awards) ପ୍ରଦାନ ସମାରୋହ ୨୨ ସେପ୍ଟେମ୍ବର ୨୦୨୬ରେ ସଫଳତାର ସହ ଅନୁଷ୍ଠିତ ହୋଇଯାଇଛି।
ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୁଖ୍ୟ ଅତିଥି ଭାବେ ଯୋଗଦେଇ ବିଭିନ୍ନ ବର୍ଗର ବିଜେତାମାନଙ୍କୁ ସମ୍ମାନିତ କରିଛନ୍ତି। ଜାତୀୟ ଚଳଚ୍ଚିତ୍ର ପୁରସ୍କାର ଇତିହାସରେ ପ୍ରଥମ ଥର ପାଇଁ ଏହି ପ୍ରତିଷ୍ଠିତ ସମାରୋହ ନୂଆଦିଲ୍ଲୀ ବାହାରେ ଆୟୋଜିତ ହୋଇଛି।
ଓଡ଼ିଶା ପାଇଁ ଗର୍ବ ଓ ଗୌରବ ‘ଲହରୀ’କୁ ଶ୍ରେଷ୍ଠ ଆଞ୍ଚଳିକ ପୁରସ୍କାର:
ଚଳିତ ବର୍ଷର ଜାତୀୟ ଚଳଚ୍ଚିତ୍ର ପୁରସ୍କାରରେ ଓଡ଼ିଶା ପାଇଁ ଏକ ବଡ଼ ସଫଳତା ଆସିଛି। ଅମର୍ତ୍ତ୍ୟ ଭଟ୍ଟାଚାର୍ଯ୍ୟଙ୍କ ଦ୍ୱାରା ନିର୍ଦ୍ଦେଶିତ ଏବଂ ଝିଲ୍ଲିକ ଭଟ୍ଟାଚାର୍ଯ୍ୟଙ୍କ ପ୍ରଯୋଜିତ (ଝିଲିକ ମୋସନ ପିକ୍ଚର ବ୍ୟାନରରେ ନିବେଦିତ) ଓଡ଼ିଆ ଚଳଚ୍ଚିତ୍ର ‘ଲହରୀ’
କୁ ଶ୍ରେଷ୍ଠ ଓଡ଼ିଆ ଆଞ୍ଚଳିକ ଚଳଚ୍ଚିତ୍ର (Best Odia Film) ଭାବେ ପୁରସ୍କୃତ କରାଯାଇଛି।
ଚଳଚ୍ଚିତ୍ରର କାହାଣୀ ଓ ବାର୍ତ୍ତା: ସାମାଜିକ ଜୀବନର ମୂଳ ତତ୍ତ୍ୱ, ବାପ-ପୁଅର ସମ୍ପର୍କ, ବାସ୍ତବ ଜୀବନର ଉତ୍ଥାନ-ପତନ ଏବଂ ଇକୋ ଟୁରିଜିମ୍ ମାଧ୍ୟମରେ ଗ୍ରାମାଞ୍ଚଳର ବିକାଶ ଧାରାକୁ ଏଥିରେ ଅତି ସୁନ୍ଦର ଭାବେ ଚିତ୍ରଣ କରାଯାଇଛି।
କଳାକାର ଓ ସହଯୋଗୀ: ଏଥିରେ ଚୌଧୁରୀ ଜୟପ୍ରକାଶ ଦାସ, ଚୌଧୁରୀ ବିକାଶ ଦାସ, ସ୍ମୃତି ମହଲା, ଦୀପାନ୍ୱିତ ଦାସ ମହାପାତ୍ର, ସୁଶାନ୍ତ ମିଶ୍ର, ହର ରଥ, ସ୍ୱସ୍ତିକ ଚୌଧୁରୀ ପ୍ରମୁଖ ଅଭିନୟ କରିଛନ୍ତି। କିଶଳୟ ରୟ ସଙ୍ଗୀତ ନିର୍ଦ୍ଦେଶନା ଦେଇଥିବା ବେଳେ ଗୌରବ ଆନନ୍ଦ ଓ ନବ୍ୟା ଜାଇତି କଣ୍ଠଦାନ କରିଛନ୍ତି।
ଅନ୍ୟାନ୍ୟ ପ୍ରମୁଖ ବିଜେତା:
ଦାଦା ସାହେବ ଫାଲକେ ପୁରସ୍କାର: ବିଶିଷ୍ଟ କନ୍ନଡ଼ ଅଭିନେତା ଅନନ୍ତ ନାଗ।
ଶ୍ରେଷ୍ଠ ଫିଚର୍ ଫିଲ୍ମ: ‘ଆର୍ଟିକିଲ୍ ୩୭୦’ (Article 370)।
ଶ୍ରେଷ୍ଠ ଅଭିନେତା: କାର୍ତ୍ତିକ୍ ଆର୍ଯ୍ୟନ୍ ଓ ମାମୁଟି।
ଶ୍ରେଷ୍ଠ ଅଭିନେତ୍ରୀ: ୟାମୀ ଗୌତମ।
ଶ୍ରେଷ୍ଠ ପଦାର୍ପଣକାରୀ ନିର୍ଦ୍ଦେଶକ: ରଣଦୀପ ହୁଡା (‘ସ୍ୱାତନ୍ତ୍ର୍ୟ ବୀର ସାଭରକର’ ଫିଲ୍ମ ପାଇଁ)।
ଅଣଫିଚର୍ ଓ ପ୍ରାମାଣିକ ଫିଲ୍ମ: ‘ଭଙ୍ଗାର’ (ଶ୍ରେଷ୍ଠ ଅଣଫିଚର) ଏବଂ ‘ରାମ-ନାମୀ’ (ଶ୍ରେଷ୍ଠ ପ୍ରାମାଣିକ ଫିଲ୍ମ)।
