ଲଣ୍ଡନ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ତଥା ପୂର୍ବତନ କ୍ରିକେଟର୍ ଇମ୍ରାନ୍ ଖାନ୍ଙ୍କ ପ୍ରାକ୍ତନ ପତ୍ନୀ ଜେମିମା ଗୋଲ୍ଡସ୍ମିଥ୍ଙ୍କ ଜୀବନରେ ଏକ ନୂଆ ଅଧ୍ୟାୟ ଆରମ୍ଭ ହୋଇଛି। ୫୨ ବର୍ଷୀୟା ଜେମିମା ଆଇରିସ୍-ଅଷ୍ଟ୍ରେଲିୟ ଆର୍ଥିକ ବିଶେଷଜ୍ଞ (Financier) ତଥା ବିଲେନିୟର ବ୍ୟବସାୟୀ କାମେରନ୍ ଓ’ରେଲି (୬୨)ଙ୍କୁ ବିବାହ କରିଛନ୍ତି। ଏକ ବ୍ୟକ୍ତିଗତ ଉତ୍ସବରେ ଏହି ବିବାହ ସମ୍ପନ୍ନ ହୋଇଥିବା ନେଇ ତାଙ୍କ ପରିବାର ପକ୍ଷରୁ ସ୍ପଷ୍ଟ କରାଯାଇଛି।
ଜେମିମା ୧୯୯୫ରୁ ୨୦୦୪ ପର୍ଯ୍ୟନ୍ତ ପ୍ରାୟ ୯ ବର୍ଷ ଧରି ଇମ୍ରାନ୍ ଖାନ୍ଙ୍କ ସହ ବିବାହ ବନ୍ଧନରେ ଥିଲେ। ଏହି ଦମ୍ପତିଙ୍କର ସୁଲେମାନ୍ ଏବଂ କାସିମ୍ ନାମକ ଦୁଇଟି ପୁଅ ଅଛନ୍ତି। ବର୍ତ୍ତମାନ ପାକିସ୍ତାନର ରାୱଲପିଣ୍ଡି ଜେଲ୍ରେ ବନ୍ଦୀ ଥିବା ଇମ୍ରାନ୍ ଖାନ୍ଙ୍କ ମୁକ୍ତି ଓ ସ୍ୱାସ୍ଥ୍ୟବସ୍ଥାକୁ ନେଇ ଜେମିମା ଓ ତାଙ୍କ ପୁଅମାନେ ସ୍ୱର ଉତ୍ତୋଳନ କରିଆସୁଛନ୍ତି। ଗତ ମାସରେ ମଧ୍ୟ ସେ ଇମ୍ରାନ୍ଙ୍କ ଗିରଫଦାରୀକୁ “ମାନବାଧିକାର ଜରୁରୀକାଳୀନ ସ୍ଥିତି” ବୋଲି ଅଭିହିତ କରିଥିଲେ।
ପରିଚୟ ଓ କ୍ୟାରିୟର୍: ଜେମିମା ‘ଇନଷ୍ଟିଙ୍କଟ୍ ପ୍ରୋଡକ୍ସନ୍ସ’ ନାମକ ଏକ ଫିଲ୍ମ ପ୍ରଯୋଜନା ସଂସ୍ଥାର ସଂସ୍ଥାପକ। ସେ ନିର୍ଦ୍ଦେଶକ ଶେଖର କପୁରଙ୍କ ରୋମାଣ୍ଟିକ କମେଡି ‘ୱାଟ୍ସ ଲଭ୍ ଗଟ୍ ଟୁ ଡୁ ୱିଥ୍ ଇଟ୍?’ ଭଳି କେତେକ ବହୁଚର୍ଚ୍ଚିତ ଚଳଚ୍ଚିତ୍ର ଏବଂ ଟେଲିଭିଜନ ପ୍ରକଳ୍ପର କାହାଣୀ ଲେଖିବା ସହ ପ୍ରଯୋଜନା କରିଛନ୍ତି।
ସମ୍ପର୍କର ଆରମ୍ଭ: ଫିଲ୍ମ, ଡକ୍ୟୁମେଣ୍ଟାରୀ ଏବଂ ସାମାଜିକ କାର୍ଯ୍ୟ ପ୍ରତି ସମାନ ରୁଚି ଯୋଗୁଁ ଜେମିମା ଏବଂ କାମେରନ୍ଙ୍କ ମଧ୍ୟରେ ସାକ୍ଷାତ ହୋଇଥିଲା।
ଅନ୍ୟାନ୍ୟ ଅବଦାନ: ଜେମିମା ଜଣେ ଜଣାଶୁଣା ସାମ୍ବାଦିକା ଏବଂ ମାନବାଧିକାର କର୍ମୀ ଭାବେ ‘ଦି ନ୍ୟୁ ଷ୍ଟେଟ୍ସମ୍ୟାନ୍’ ଏବଂ ‘ଭାନିଟି ଫେୟାର’ ଭଳି ଅନ୍ତର୍ଜାତୀୟ ପତ୍ରିକାରେ ନିଜର ଯୋଗଦାନ ଦେଇଛନ୍ତି।
