ଭୁବନେଶ୍ୱର: ଓଡ଼ିଶାରେ ସ୍କୁଲ ପାଠ୍ୟପୁସ୍ତକ ମୁଦ୍ରଣ ଏବଂ ଯୋଗାଣରେ ବ୍ୟାପକ ଅନିୟମିତତା ଅଭିଯୋଗକୁ ନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ କଡ଼ା ପଦକ୍ଷେପ ଗ୍ରହଣ କରିଛନ୍ତି। ରାଜ୍ୟର ସ୍କୁଲ ଓ ଗଣଶିକ୍ଷା ବିଭାଗକୁ ଏହି ମାମଲାରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ PMO ପକ୍ଷରୁ ନିର୍ଦ୍ଦେଶ ଦିଆଯାଇଛି।
ଆରଟିଆଇ (RTI) କର୍ମୀ ତଥା ସ୍ୱଚ୍ଛତା କର୍ମୀ ପ୍ରଦୀପ ପ୍ରଧାନଙ୍କ ଏକ ଅଭିଯୋଗକୁ ଆଧାର କରି ଏହି ହସ୍ତକ୍ଷେପ କରାଯାଇଛି। ଅଭିଯୋଗ ଅନୁଯାୟୀ: ଓଡ଼ିଶା ସରକାରୀ ପ୍ରେସର ଉପନିର୍ଦ୍ଦେଶକ ସୁଭ୍ରଜିତ ନାୟକ ୨୦୨୨ ମସିହାରୁ ପାଠ୍ୟପୁସ୍ତକ ମୁଦ୍ରଣ କାର୍ଯ୍ୟର ଦାୟିତ୍ୱରେ ଅଛନ୍ତି। ସେ ବାଣିଜ୍ୟ ବିଭାଗର ଅଧିକାରୀ ହୋଇଥିବାବେଳେ ପାଠ୍ୟପୁସ୍ତକ ମାମଲା ସ୍କୁଲ ଓ ଗଣଶିକ୍ଷା ବିଭାଗାଧୀନ ହୋଇଥିବାରୁ ତାଙ୍କର ଏହି କାର୍ଯ୍ୟଭାରକୁ ନେଇ ପ୍ରଶ୍ନ ଉଠିଛି।
ବେସରକାରୀ ମୁଦ୍ରଣ ପ୍ରେସ୍ ଏବଂ ଯୋଗାଣକାରୀଙ୍କ ଚୟନରେ ସେ ପ୍ରଭାବ ପକାଇଥିବା ଏବଂ ତାଙ୍କ ପତ୍ନୀଙ୍କ ଦ୍ୱାରା ପରିଚାଳିତ ଏକ ବେସରକାରୀ ଏଜେନ୍ସି ଜରିଆରେ ଠିକା ଦିଆଯାଇଥିବା ଅଭିଯୋଗ ହୋଇଛି। ଏହି ଅନିୟମିତତା କାରଣରୁ ଛାତ୍ରଛାତ୍ରୀମାନେ ପାଇଥିବା ବହିଗୁଡ଼ିକରେ ବହୁ ତ୍ରୁଟି ଏବଂ ଖରାପ ମାନର ସମସ୍ୟା ଦେଖାଦେଇଥିଲା।
ଏହି ଦୁର୍ନୀତିର ଏକ ବ୍ୟାପକ ଏବଂ ନିରପେକ୍ଷ ତଦନ୍ତ ପାଇଁ ଦାବି ହୋଇଥିବାବେଳେ, ସିବିଆଇ (CBI) ଜରିଆରେ ତଦନ୍ତ କରାଇ ସମସ୍ତ ଦୋଷୀ ଅଧିକାରୀଙ୍କୁ ଚିହ୍ନଟ କରିବାକୁ ପ୍ରଦୀପ ପ୍ରଧାନ ଦାବି କରିଛନ୍ତି। PMO ଏହି ମାମଲାକୁ ଗ୍ରହଣ କରି ଗଣଶିକ୍ଷା ବିଭାଗକୁ ଆବଶ୍ୟକୀୟ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି।
