SCB ମେଡିକାଲରେ ଅଘଟଣ: ମାନସିକ ରୋଗୀଙ୍କୁ ମାଡ଼ ମାରି ହତ୍ୟା ଅଭିଯୋଗ, ମଙ୍ଗଳାବାଗ ଥାନାରେ ଏଫ୍ଆଇଆର୍

କଟକ: କଟକର ଶ୍ରୀରାମଚନ୍ଦ୍ର ଭଞ୍ଜ (SCB) ମେଡିକାଲ କଲେଜ ଏବଂ ହସ୍ପିଟାଲର ମାନସିକ ରୋଗ ବିଭାଗରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଚିକିତ୍ସାଧୀନ ଅବସ୍ଥାରେ ଜଣେ ରୋଗୀଙ୍କର ମୃତ୍ୟୁ ହୋଇଥିବାବେଳେ, ହସ୍ପିଟାଲର ସୁରକ୍ଷା କର୍ମୀ ଏବଂ ଜଣେ ଆଟେଣ୍ଡାଣ୍ଟଙ୍କ ମାଡ଼ରେ ତାଙ୍କର ମୃତ୍ୟୁ ହୋଇଥିବା ପରିବାର ପକ୍ଷରୁ ସାଙ୍ଘାତିକ ଅଭିଯୋଗ ହୋଇଛି।

ମୃତକ ଜଣକ ଯାଜପୁର ଜିଲ୍ଲାର ବୋଲି ଜଣାପଡ଼ିଥିବାବେଳେ, ଗତ ଦୁଇ ଦିନ ପୂର୍ବେ ତାଙ୍କୁ ଚିକିତ୍ସା ପାଇଁ ମେଡିକାଲରେ ଭର୍ତ୍ତି କରାଯାଇଥିଲା।ମୃତ୍ୟୁ ପରେ ପରିବାରବର୍ଗ ଅଭିଯୋଗ କରିଛନ୍ତି ଯେ ରୋଗୀଙ୍କ ଶରୀରରୋ ଏକାଧିକ ଆଘାତ ଏବଂ ମାଡ଼ ହୋଇଥିବାର ଚିହ୍ନ ରହିଛି। ହସ୍ପିଟାଲର ଜଣେ ସୁରକ୍ଷା କର୍ମୀ ଏବଂ ଆଟେଣ୍ଡାଣ୍ଟ ଏକ ପ୍ଲାଷ୍ଟିକ ପାଇପ୍‌ରେ ତାଙ୍କୁ ନିର୍ମମ ଭାବେ ମାଡ଼ ମାରିଥିବା ପରିବାର ପକ୍ଷରୁ ଦାବି କରାଯାଇଛି।

ଏହି ଘଟଣା ସାମ୍ନାକୁ ଆସିବା ପରେ ମୃତକଙ୍କ ପରିବାର ମଙ୍ଗଳାବାଗ ଥାନାରେ ପହଞ୍ଚି ଏକ ଲିଖିତ ଅଭିଯୋଗ ଦାଖଲ କରିଛନ୍ତି। ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା ରୁଜୁ କରିବା ସହ ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଆରମ୍ଭ କରିଛି। ବର୍ତ୍ତମାନ ସୁଦ୍ଧା ମୃତ୍ୟୁର ପ୍ରକୃତ କାରଣ ଏବଂ ପରିସ୍ଥିତି ସମ୍ପର୍ଣ୍ଣ ସ୍ପଷ୍ଟ ହୋଇନଥିବାବେଳେ ହସ୍ପିଟାଲ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ।