ମୁମ୍ବାଇ: ବଲିଉଡ୍ ଅଭିନେତା ଆମିର ଖାନଙ୍କ ଭଣଜା ତଥା ଅଭିନେତା ଇମ୍ରାନ ଖାନ ଆଇନଗତ ଜାଲରେ ଛନ୍ଦି ହୋଇଛନ୍ତି। ମୁମ୍ବାଇର ଅଗଷ୍ଟ କ୍ରାନ୍ତି ମଇଦାନରେ ଅନୁଷ୍ଠିତ ଏକ ପ୍ରତିବାଦ ସଭାରେ ଭାଗ ନେଇଥିବାରୁ ମୁମ୍ବାଇ ପୋଲିସ ତାଙ୍କୁ ଆସନ୍ତା ଅକ୍ଟୋବର ୨୮ ଭିତରେ ଭାରତ ଛାଡ଼ିବାକୁ ନିର୍ଦ୍ଦେଶ ଦେଇ ଏକ କଡ଼ା ନୋଟିସ୍ ଜାରି କରିଛି।
ପ୍ରାପ୍ତ ସୂଚନା ଅନୁଯାୟୀ, ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବି କରି ଅକ୍ଟୋବର ୧୦ ତାରିଖରେ ମୁମ୍ବାଇର ଅଗଷ୍ଟ କ୍ରାନ୍ତି ମଇଦାନରେ କକ୍ରୋଚ୍ ଜନତା ପାର୍ଟି ପକ୍ଷରୁ ଏକ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଇମ୍ରାନ ଖାନ ଜଣେ ଭାରତୀୟ ନାଗରିକ ନୁହଁନ୍ତି; ସେ ଜନ୍ମରୁ ଆମେରିକାର ନାଗରିକ ଏବଂ ଭାରତରେ ରହିବା ପାଇଁ ତାଙ୍କ ପାଖରେ ଓସିଆଇ କାର୍ଡ ରହିଛି।
ଭାରତୀୟ ନାଗରିକ ନଥାଇ ମଧ୍ୟ ଏକ ରାଜନୈତିକ କିମ୍ବା ବିବାଦୀୟ ପ୍ରତିବାଦରେ ଅଂଶଗ୍ରହଣ କରିଥିବାରୁ ଇମ୍ରାନଙ୍କ ବିରୋଧରେ ଏମିତି ପଦକ୍ଷେପ ନିଆଯାଇଛି। ପ୍ରତିବାଦ ସମୟରେ ପୋଲିସ ତାଙ୍କୁ ଅସ୍ଥାୟୀ ଭାବେ ଅଟକ ମଧ୍ୟ ରଖିଥିଲା।
ପୋଲିସ ଭ୍ୟାନ ଭିତରୁ ସେ ସୋସିଆଲ ମିଡିଆରେ ଏକ ଫଟୋ ସେୟାର କରି ଚର୍ଚ୍ଚାକୁ ଆସିଥିଲେ। ବର୍ତ୍ତମାନ ଇମ୍ରାନଙ୍କୁ ଇମିଗ୍ରେସନ ଆଇନର ପ୍ରାବଧାନ ଅନୁଯାୟୀ ନୋଟିସ୍ ମିଳିଥିବାରୁ ଫିଲ୍ମ ଜଗତରେ ଏହାକୁ ନେଇ ବଡ଼ଧରଣର ଆଲୋଚନା ସୃଷ୍ଟି ହୋଇଛି।
