ଯୁକ୍ତ ଦୁଇ ଏକ୍ସ-ରେଗୁଲାର୍ ଛାତ୍ରଛାତ୍ରୀଙ୍କ ପାଇଁ ବଡ଼ ଆଶ୍ୱସ୍ତି: ଫର୍ମ ପୂରଣ ଅବଧି ବୃଦ୍ଧି କଲା CHSE

ଭୁବନେଶ୍ୱର: ୨୦୨୭ ବାର୍ଷିକ ଯୁକ୍ତ ଦୁଇ ପରୀକ୍ଷା ପାଇଁ ଏକ୍ସ-ରେଗୁଲାର୍ ଛାତ୍ରଛାତ୍ରୀମାନଙ୍କୁ ବଡ଼ ଆଶ୍ୱସ୍ତି ମିଳିଛି। ବିନା ଜରିମାନାରେ ଫର୍ମ ପୂରଣ କରିବାର ଶେଷ ତାରିଖକୁ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ଆସନ୍ତା ଅକ୍ଟୋବର ୧୨, ୨୦୨୬ ପର୍ଯ୍ୟନ୍ତ ବୃଦ୍ଧି କରାଯାଇଛି।

ପୂର୍ବରୁ ଫର୍ମ ଦାଖଲର ଶେଷ ତାରିଖ ଅକ୍ଟୋବର ୯ ଧାର୍ଯ୍ୟ କରାଯାଇଥିଲା। କିନ୍ତୁ କ୍ୟାମ୍ପସଗୁଡ଼ିକରେ ଛାତ୍ର ସଂସଦ ନିର୍ବାଚନର ପ୍ରସ୍ତୁତି ଏବଂ ବିଭିନ୍ନ କଲେଜ କର୍ତ୍ତୃପକ୍ଷଙ୍କ ଅନୁରୋଧକୁ ଦୃଷ୍ଟିରେ ରଖି ଛାତ୍ରଛାତ୍ରୀମାନେ ଯେପରି କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି, ସେଥିପାଇଁ ପରିଷଦ ଏହି ପଦକ୍ଷେପ ନେଇଛି।

ପରୀକ୍ଷା ନିୟନ୍ତ୍ରକ ଡ. ପ୍ରସାନ୍ତ କୁମାର ପରିଡ଼ାଙ୍କ ଦ୍ୱାରା ଅକ୍ଟୋବର ୮ ତାରିଖରେ ଜାରି ହୋଇଥିବା ବିଜ୍ଞପ୍ତି ଅନୁଯାୟୀ, ଏହି ବର୍ଦ୍ଧିତ ସମୟସୀମା ନିମ୍ନଲିଖିତ ସମସ୍ତ ଧାରା କଳା, ବାଣିଜ୍ୟ, ବିଜ୍ଞାନ, ବୃତ୍ତିଗତ, ଦୂରଶିକ୍ଷା ପାଇଁ ପ୍ରଯୁଜ୍ୟ ହେବ ।

CHSE ପକ୍ଷରୁ ସମସ୍ତ ଅଫିଲିଏଟେଡ୍ କଲେଜର ଅଧ୍ୟକ୍ଷମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ ସେମାନେ ଏହି ନିର୍ଦ୍ଧିଷ୍ଟ ସମୟସୀମା (ଅକ୍ଟୋବର ୧୨) ମଧ୍ୟରେ ସମସ୍ତ ଯୋଗ୍ୟ ଏକ୍ସ-ରେଗୁଲାର୍ ଛାତ୍ରଛାତ୍ରୀଙ୍କ ଫର୍ମ ପୂରଣ ପ୍ରକ୍ରିୟାକୁ ସମ୍ପୂର୍ଣ୍ଣ କରାନ୍ତୁ। ପରୀକ୍ଷା ପ୍ରକ୍ରିୟା ପାଇଁ ପୂର୍ବରୁ ଘୋଷିତ ଅନ୍ୟ ସମସ୍ତ ତାରିଖ ଏବଂ ନିୟମାବଳୀ ଅପରିବର୍ତ୍ତିତ ରହିଛି।

ଆଗାମୀ ଅକ୍ଟୋବର ୧୫ରେ ରାଜ୍ୟର ସମସ୍ତ କଲେଜରେ ଛାତ୍ର ସଂସଦ ନିର୍ବାଚନ ହେବାକୁ ଥିବାରୁ, ଏହି ସମୟବୃଦ୍ଧି ଛାତ୍ରଛାତ୍ରୀ ଏବଂ କଲେଜ ପ୍ରଶାସନକୁ ବେଶ୍ ସହାୟକ ହେବ।