ନିର୍ବାଚନରେ SEBC ପ୍ରତିନିଧିତ୍ୱ ଏବଂ ରାଜନୈତିକ ପଛୁଆପଣ ଅଧ୍ୟୟନ ପାଇଁ କମିଶନ ଗଠନ

ଭୁବନେଶ୍ୱର: ରାଜ୍ୟର ଗ୍ରାମାଞ୍ଚଳ ଏବଂ ସହରାଞ୍ଚଳର ସ୍ଥାନୀୟ ସ୍ୱାୟତ୍ତ ଶାସନ ପ୍ରତିଷ୍ଠାନ ଗୁଡ଼ିକରେ ସାମାଜିକ ଓ ଶୈକ୍ଷିକ ଭାବେ ପଛୁଆ ବର୍ଗ (SEBC) ର ପ୍ରତିନିଧିତ୍ୱ ଏବଂ ରାଜନୈତିକ ପଛୁଆପଣ ଅଧ୍ୟୟନ କରିବା ପାଇଁ ଓଡ଼ିଶା ସରକାର ଏକ ସ୍ୱତନ୍ତ୍ର କମିଶନ ଗଠନ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅନୁମୋଦନ କ୍ରମେ ଏହି ପଦକ୍ଷେପ ନିଆଯାଇଛି।

ବୁଧବାର ଦିନ ରାଜ୍ୟ ଅନୁସୂଚିତ ଜାତି ଓ ଜନଜାତି ବିକାଶ, ସଂଖ୍ୟାଲଘୁ ଏବଂ ପଛୁଆ ବର୍ଗ କଲ୍ୟାଣ ବିଭାଗ ପକ୍ଷରୁ ଏହି କମିଶନ ଗଠନ ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି।

କମିଶନର କର୍ମକର୍ତ୍ତା: ଓଡ଼ିଶା ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ପ୍ରମଥ ପଟ୍ଟନାୟକ ଏହି କମିଶନର ମୁଖ୍ୟ ରହିଛନ୍ତି। ଅବସରପ୍ରାପ୍ତ ଆଇ.ଏ.ଏସ୍ ଅଧିକାରୀ ବିଜୟ କୁମାର ପ୍ରୁଷ୍ଟି ଏଥିରେ ସଦସ୍ୟ ଭାବେ କାର୍ଯ୍ୟ କରିବେ। ସେହିପରି ବିଭାଗୀୟ ସ୍ୱତନ୍ତ୍ର ସଚିବ ସୁଜାତା ମିଶ୍ର ଏହାର ସଦସ୍ୟ-ସଚିବ ଭାବେ ଦାୟିତ୍ୱ ନେଇଛନ୍ତି।

କମିଶନଙ୍କ କାର୍ଯ୍ୟ ଏବଂ ଉଦ୍ଦେଶ୍ୟ: ଏହି କମିଶନ ରାଜ୍ୟର ପଞ୍ଚାୟତ ଏବଂ ପୌରସଂସ୍ଥାଗୁଡ଼ିକରେ ମୋଟ ଜନସଂଖ୍ୟା ତୁଳନାରେ SEBC ନାଗରିକମାନଙ୍କ ଅନୁପାତକୁ ଯାଞ୍ଚ କରିବ। ଏହା ସହିତ ଏହି ସଂସ୍ଥାଗୁଡ଼ିକରେ ସେମାନଙ୍କର ରାଜନୈତିକ ପ୍ରତିନିଧିତ୍ୱ ଏବଂ ରାଜନୈତିକ ପଛୁଆପଣର ପ୍ରକୃତି ଓ ପ୍ରଭାବ କିପରି ରହିଛି, ତାହା ଅଧ୍ୟୟନ କରିବ।

ଏହି ଅଧ୍ୟୟନର ରିପୋର୍ଟ ଆଧାରରେ ରାଜ୍ୟ ସରକାର ସ୍ଥାନୀୟ ଶାସନ ବ୍ୟବସ୍ଥାରେ SEBC ନାଗରିକମାନଙ୍କର ଉପଯୁକ୍ତ ପ୍ରତିନିଧିତ୍ୱ ଏବଂ ସେମାନଙ୍କ ଅଧିକାର ସୁରକ୍ଷା ପାଇଁ ଆବଶ୍ୟକୀୟ ନୀତିଗତ ପଦକ୍ଷେପ ଗ୍ରହଣ କରିବେ। ସୂଚନାଯୋଗ୍ୟ ଯେ, ପୂର୍ବରୁ ରାଜ୍ୟ ସରକାର ଇଞ୍ଜିନିୟରିଂ ଏବଂ ମେଡିକାଲ୍ ସମେତ ଉଚ୍ଚବୃତ୍ତିଗତ ଶିକ୍ଷାନୁଷ୍ଠାନଗୁଡ଼ିକରେ SEBC ଛାତ୍ରଛାତ୍ରୀଙ୍କ ପାଇଁ ୧୧.୨୫% ସଂରକ୍ଷଣ ବ୍ୟବସ୍ଥା ମଧ୍ୟ ଘୋଷଣା କରିସାରିଛନ୍ତି।