ନୂଆଦିଲ୍ଲୀ: ଆଜି ପାଳନ ହେଉଛି ଭାରତୀୟ ବାୟୁସେନା ଦିବସ । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ବାୟୁସେନା ଯୋଦ୍ଧାମାନଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇବା ସହ ଦେଶସେବାରେ ସେମାନଙ୍କର ସାହସ, ବଳିଦାନ ଏବଂ ସମର୍ପଣକୁ ପ୍ରଶଂସା କରିଛନ୍ତି। ଆକାଶକୁ ସୁରକ୍ଷା ଦେବାରେ ବାୟୁସେନାର ଭୂମିକା ପାଇଁ ଦେଶ ଗର୍ବିତ ବୋଲି ସେ କହିଛନ୍ତି।
ସୋସିାଲ ମିଡିଆରେ ଶୁଭେଚ୍ଛା: ଏକ୍ସ ରେ ପୋଷ୍ଟ କରି ପ୍ରଧାନମନ୍ତ୍ରୀ ମୋଦି ଲେଖିଛନ୍ତି, “ଭାରତ ଆମର ବାୟୁସେନା ଯୋଦ୍ଧାମାନଙ୍କ ପାଇଁ ଗର୍ବିତ। ବାୟୁସେନା ଦିବସରେ ଆମେ ଆକାଶକୁ ସୁରକ୍ଷା ଦେବାରେ ସେମାନଙ୍କର ସାହସ ଏବଂ ପ୍ରତିବଦ୍ଧତାକୁ ସଲାମ କରୁଛୁ!” ଏକ ଭିଡିଓ ବାର୍ତ୍ତା ଜରିଆରେ ସେ ବାୟୁସେନାର କର୍ମଚାରୀ ଓ ସେମାନଙ୍କ ପରିବାରବର୍ଗଙ୍କୁ ଅଭିନନ୍ଦନ ଜଣାଇଛନ୍ତି।
କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମଧ୍ୟ ସୋସିଆଲ ମିଡିଆରେ ବାୟୁସେନାକୁ ଶୁଭେଚ୍ଛା ଜଣାଇ କହିଛନ୍ତି ଯେ ଆମର ବାୟୁସେନା ଯୋଦ୍ଧାମାନଙ୍କର ସାହସ, ଅନୁଶୀଳନ ଏବଂ ଦେଶପ୍ରେମ ସବୁବେଳେ ପିଢ଼ି ପିଢ଼ି ପାଇଁ ପ୍ରେରଣାଦାୟକ ହୋଇ ରହିବ। ଏହି ଅବସରରେ ସେ ଦେଶ ପାଇଁ ପ୍ରାଣବଳି ଦେଇଥିବା ଶହୀଦ ବୀରମାନଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ବାୟୁସେନାର ବୀର ଯୋଦ୍ଧାମାନଙ୍କୁ ଶୁଭେଚ୍ଛା ଜଣାଇଛନ୍ତି।
ଭାରତୀୟ ବାୟୁସେନାର ଇତିହାସ: ବ୍ରିଟିଶ୍ ଭାରତୀୟ ସମୟରେ ଅକ୍ଟୋବର ୮, ୧୯୩୨ ମସିହାରେ ଭାରତୀୟ ବାୟୁସେନା ପ୍ରତିଷ୍ଠା ହୋଇଥିଲା। ସେବେଠାରୁ ଆଜି ପର୍ଯ୍ୟନ୍ତ ଏହା ବିଶ୍ୱର ସବୁଠାରୁ ଶକ୍ତିଶାଳୀ ଏବଂ ଆଧୁନିକ ବାୟୁସେନାମାନଙ୍କ ମଧ୍ୟରେ ଅନ୍ୟତମ ଭାବେ ପରିଗଣିତ ହୋଇଆସୁଛି।
