ସ୍ୱର୍ଣ୍ଣ ପଦକ ବିଜେତା ଭାରତୀୟ ହକି ଟିମକୁ ପୁରସ୍କାର ରାଶି ପ୍ରଦାନ କଲେ ମୁଖ୍ୟମନ୍ତ୍ରୀ

ଭୁବନେଶ୍ୱର: ଏସୀୟ କ୍ରୀଡ଼ାରେ ସ୍ୱର୍ଣ୍ଣ ପଦକ ହାତେଇଥିବା ଭାରତୀୟ ପୁରୁଷ ଓ ମହିଳା ହକି ଦଳକୁ ଭୁବନେଶ୍ୱର ସ୍ଥିତ କଳିଙ୍ଗ ଷ୍ଟାଡିୟମରେ ଏକ ଭବ୍ଯ ସମାରୋହରେ ସମ୍ବର୍ଦ୍ଧିତ କରାଯାଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶୁକ୍ରବାର ସନ୍ଧ୍ୟାରେ ଉଭୟ ଦଳର ଖେଳାଳି ଏବଂ ସପୋର୍ଟ ଷ୍ଟାଫ୍‌ମାନଙ୍କୁ ସମ୍ମାନିତ କରିବା ସହ ମୋଟ ୫.୬୧ କୋଟି ଟଙ୍କାର ପୁରସ୍କାର ରାଶି ପ୍ରଦାନ କରିଛନ୍ତି।

ଘୋଷଣା ଅନୁଯାୟୀ, ଦଳର ପ୍ରତ୍ୟେକ ଖେଳାଳିଙ୍କୁ ୧୧ ଲକ୍ଷ ଟଙ୍କା ଏବଂ ପ୍ରତ୍ୟେକ ସପୋର୍ଟ ଷ୍ଟାଫ୍‌ଙ୍କୁ ୫.୫ ଲକ୍ଷ ଟଙ୍କା ପ୍ରଦାନ କରାଯାଇଛି। ଏହାଛଡ଼ା ଓଡ଼ିଶାର ଗର୍ବ ତଥା ସୁନ୍ଦରଗଡ଼ ଜିଲ୍ଲାର ଖେଳାଳି ପୁରୁଷ ଦଳର ଅମିତ ରୋହିଦାସ ଏବଂ ଶିଳାନନ୍ଦ ଲକ୍ରା ଏବଂ ମହିଳା ଦଳର ସୁନେଲିତା ଟପ୍ପୋ ଙ୍କୁ ସେମାନଙ୍କର ଉତ୍କୃଷ୍ଟ ପ୍ରଦର୍ଶନ ପାଇଁ ଅତିରିକ୍ତ ୨୦ ଲକ୍ଷ ଟଙ୍କା ଲେଖାଏଁ ପୁରସ୍କାର ପ୍ରଦାନ କରାଯାଇଛି।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭାରତୀୟ ପୁରୁଷ ଦଳର କ୍ୟାପଟେନ୍ ହରମନପ୍ରୀତ ସିଂହ ଏବଂ ମହିଳା ଦଳର କ୍ୟାପଟେନ୍ ସଲିମା ଟେଟେଙ୍କ ନେତୃତ୍ୱକୁ ପ୍ରଶଂସା କରିବା ସହ ଖେଳାଳିମାନଙ୍କୁ ଦେଶର ଯୁବପିଢ଼ିଙ୍କ ପାଇଁ ରୋଲ୍ ମଡେଲ୍ ବୋଲି ଅଭିହିତ କରିଛନ୍ତି।

ଏହି ଅବସରରେ ମୁଖ୍ୟମନ୍ତ୍ରୀ ରାଜ୍ୟରେ କ୍ରୀଡ଼ା ଭିତ୍ତିଭୂମିର ପ୍ରସାର ବିଷୟରେ ଆଲୋଚନା କରି କହିଛନ୍ତି ଯେ, ସରକାର ଭୁବନେଶ୍ୱର ବ୍ୟତୀତ ବ୍ଲକ ସ୍ତରରେ ମଧ୍ୟ ୪,୦୦୦ କୋଟିରୁ ଅଧିକ ଜଳ ପ୍ରକଳ୍ପ ଜରିଆରେ ଷ୍ଟାଡିୟମ ନିର୍ମାଣ କରୁଛନ୍ତି। ପ୍ରସ୍ତାବିତ ୧,୦୦୦ କୋଟି ଟଙ୍କାର ଗୋଠପାଟଣାସ୍ଥିତ ‘ଗ୍ଲୋବାଲ ସ୍ପୋର୍ଟସ୍ କମ୍ପ୍ଲେକ୍ସ’ ଏବଂ କଳିଙ୍ଗ ଷ୍ଟାଡିୟମରେ ହେବାକୁଥିବା ୨୦୨୮ ବିଶ୍ୱ ଇନଡୋର୍ ଆଥଲେଟିକ୍ସ ଚାମ୍ପିୟନସିପ୍ ଓଡ଼ିଶାର ସ୍ଥାନକୁ ଆହୁରି ମଜଭୁତ କରିବ।

ଏହି ସମ୍ବର୍ଦ୍ଧନା ସମାରୋହରେ କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୂରଜ, ହକି ଇଣ୍ଡିଆ ସଭାପତି ଦିଲ୍ଲୀପ ତିର୍କୀ, ମୁଖ୍ୟ ଶାସନ ସଚିବ ଅନୁ ଗର୍ଗ ପ୍ରମୁଖ ଉପସ୍ଥିତ ଥିଲେ।