ନୂଆଦିଲ୍ଲୀ: ୪ଟି ରାଜ୍ୟରେ ଅନୁଷ୍ଠିତ ମୋଟ ୨୮ଟି ବିଧାନ ପରିଷଦ ନିର୍ବାଚନରେ କଂଗ୍ରେସ ଦଳ ଗୋଟିଏ ହେଲେ ବି ଆସନ ଜିତିବାରେ ବିଫଳ ହେବା ପରେ ବିଜେପି ଶୀର୍ଷ ନେତୃତ୍ୱ କଂଗ୍ରେସକୁ କୋଣଠେସା କରିଛନ୍ତି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବୁଧବାର ସାମାଜିକ ଗଣମାଧ୍ୟମ ‘X’ ରେ କଂଗ୍ରେସ ଏବଂ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ କଡ଼ା କଟାକ୍ଷ କରିଛନ୍ତି।
ଅମିତ ଶାହ ନିଜ ପୋଷ୍ଟରେ ଲେଖିଛନ୍ତି, “କଂଗ୍ରେସ ୨୮ଟି ମଧ୍ୟରୁ କେତୋଟି ଆସନ ଜିତିଲା… ‘୦’! ବାଲଟ୍ ବକ୍ସ ଇସ୍ତଫା ଦିଅ… (Ballot Box, resign)”। ଇଲେକ୍ଟ୍ରୋନିକ୍ ଭୋଟିଂ ମେସିନ୍ ରେ ଗୋଲମାଲ ହେଉଛି ଏବଂ ନିର୍ବାଚନ ବାଲଟ୍ ପେପର୍ରେ ହେବା ଉଚିତ୍ ବୋଲି କଂଗ୍ରେସ ଦୀର୍ଘ ଦିନରୁ ଦାବି କରିଆସୁଥିବା ବେଳେ, ବାଲଟ୍ ପେପର୍ରେ ନିର୍ବାଚନ ହୋଇ ସୁଦ୍ଧା କଂଗ୍ରେସ ସୂନ ଆସନ ପାଇବାକୁ ନେଇ ଶାହ ଏହି ବ୍ୟଙ୍ଗାତ୍ମକ ବାଣ ମାରିଛନ୍ତି। ପୋଷ୍ଟ ସହ ସେ ଏକ କାର୍ଟୁନ୍ ଚିତ୍ର ଶେୟାର କରିଛନ୍ତି, ଯେଉଁଥିରେ ରାହୁଲ ଗାନ୍ଧୀ ନିରାଶ ହୋଇ ନିର୍ବାଚନ ଫଳାଫଳକୁ ଚାହିଁ ରହିଥିବାର ଦେଖାଯାଉଛି।
ଉତ୍ତରପ୍ରଦେଶ, ମହାରାଷ୍ଟ୍ର, ବିହାର ଏବଂ କର୍ଣ୍ଣାଟକ ଆଦି ୪ଟି ରାଜ୍ୟର ୨୮ଟି ଗ୍ରାଜୁଏଟ୍ ଓ ଟିଚର୍ସ ବିଧାନ ପରିଷଦ ଆସନ ପାଇଁ ଏହି ଦ୍ୱିବାର୍ଷିକ ନିର୍ବାଚନ ଅନୁଷ୍ଠିତ ହୋଇଥିଲା। ଶାସକ କଂଗ୍ରେସ ଗାଦିରେ ଥିବା କର୍ଣ୍ଣାଟକରେ ବିଜେପି-ଜେଡିଏସ୍ ମେଣ୍ଟ ସମସ୍ତ ୪ଟି ଆସନରେ ବିଜୟୀ ହୋଇ କଂଗ୍ରେସକୁ ନିଶ୍ଚିହ୍ନ କରିଦେଇଛି। ଉତ୍ତରପ୍ରଦେଶରେ ବିଜେପି ଏକାଧିକ ଆସନ ଜିତିଥିବା ବେଳେ ସମାଜବାଦୀ ପାର୍ଟି ମୁଖ୍ୟ ବିରୋଧୀ ଦଳ ଭାବେ କିଛି ଆସନ ହାତେଇଛି। ବିହାର ଏବଂ ମହାରାଷ୍ଟ୍ରରେ ମଧ୍ୟ ବିଜେପି ଓ ତାହାର ମେଣ୍ଟ ସହଯୋଗୀମାନେ ପ୍ରଭାବଶାଳୀ ପ୍ରଦର୍ଶନ କରିଥିବା ବେଳେ କଂଗ୍ରେସ ସବୁଠି ଖାତା ଖୋଲିବାରେ ବିଫଳ ହୋଇଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ବାଲଟ୍ ପେପର୍ରେ ହୋଇଥିବା ଏହି ନିର୍ବାଚନରେ କଂଗ୍ରେସର ନିରାଶାଜନକ ପ୍ରଦର୍ଶନକୁ ନେଇ ତୀବ୍ର ଆକ୍ରମଣ କରିଥିଲେ। ଯଦିଓ ଏମ୍ଏଲ୍ସି ନିର୍ବାଚନ ଆଗାମୀ ସାଧାରଣ ନିର୍ବାଚନର ସମ୍ପୂର୍ଣ୍ଣ ମାପଦଣ୍ଡ ନୁହେଁ, ତଥାପି ଶିକ୍ଷିତ ଏବଂ ଶିକ୍ଷକ ବର୍ଗଙ୍କ ମଧ୍ୟରେ ରାଜନୈତିକ ସ୍ଥିତି ଓ ପ୍ରଭାବ ଆକଳନ ପାଇଁ ଏହାକୁ ବେଶ୍ ଗୁରୁତ୍ୱପୂର୍ଣ୍ଣ ମନେକରାଯାଏ।
