ନୂଆଦିଲ୍ଲୀ: କେନ୍ଦ୍ରୀୟ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ଏକ ବଡ଼ ଏବଂ ଆଶ୍ୱସ୍ତିକର ଖବର ସାମ୍ନାକୁ ଆସିଛି। ଆସନ୍ତା ସେପ୍ଟେମ୍ବର ୨୮ରୁ ୩୦ ତାରିଖ ପର୍ଯ୍ୟନ୍ତ ପ୍ରସ୍ତାବିତ ତିନି ଦିନିଆ ବ୍ୟାଙ୍କ ଧର୍ମଘଟକୁ ଦୃଷ୍ଟିରେ ରଖି କେନ୍ଦ୍ର ସରକାର ସେପ୍ଟେମ୍ବର ମାସର ଦରମା ଏବଂ ପେନସନ ନିର୍ଦ୍ଧାରିତ ତାରିଖ ପୂର୍ବରୁ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି।
ଅର୍ଥ ମନ୍ତ୍ରାଳୟର ନିର୍ଦ୍ଦେଶ କ୍ରମେ, ସେପ୍ଟେମ୍ବର ୨୦୨୬ ର ଦରମା ଏବଂ ପେନସନ ଆଜି ଅର୍ଥାତ୍ ସେପ୍ଟେମ୍ବର ୨୫ (ଶୁକ୍ରବାର) ଦିନ ଜାରି କରାଯିବ। ବ୍ୟାଙ୍କ ଧର୍ମଘଟ ସମୟରେ ବ୍ୟାଙ୍କିଙ୍ଗ କାରବାର ପ୍ରଭାବିତ ହେବାର ଆଶଙ୍କା ରହିଥିବାରୁ ସରକାର ଏହି ଅଗ୍ରିମ ଦେୟ ପ୍ରଦାନ କରିବାକୁ ପଦକ୍ଷେପ ନେଇଛନ୍ତି।
କଣ୍ଟ୍ରୋଲର୍ ଜେନେରାଲ୍ ଅଫ୍ ଆକାଉଣ୍ଟ୍ସ (CGA) ଦ୍ୱାରା ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ ସମସ୍ତ କେନ୍ଦ୍ରୀୟ ସରକାରୀ କର୍ମଚାରୀ । କେନ୍ଦ୍ର ସରକାରଙ୍କ ଶିଳ୍ପ କର୍ମଚାରୀମାନେ। ସମସ୍ତ କେନ୍ଦ୍ରୀୟ ସରକାରୀ ପେନସନଭୋଗୀ, ଯେଉଁମାନେ ବ୍ୟାଙ୍କ କିମ୍ବା ପେ ଆଣ୍ଡ ଆକାଉଣ୍ଟ୍ସ ଅଫିସ୍ ମାଧ୍ୟମରେ ପେନସନ ପାଆନ୍ତି।
UFBU ପକ୍ଷରୁ ସେପ୍ଟେମ୍ବର ୨୮ରୁ ୩୦ ପର୍ଯ୍ୟନ୍ତ ବ୍ୟାଙ୍କ ଧର୍ମଘଟ ଡାକରା ଦିଆଯାଇଛି। ଏହି ସମୟରେ ତ୍ରୈମାସିକର ଶେଷ ଦିନଗୁଡ଼ିକ ମଧ୍ୟ ପଡ଼ୁଥିବାରୁ କାରବାର ବାଧାପ୍ରାପ୍ତ ହୋଇପାରେ। ସରକାର ସ୍ପଷ୍ଟ କରିଛନ୍ତି ଯେ ଏହି ଅଗ୍ରିମ ଦେୟକୁ ଆଗୁଆ ପେମେଣ୍ଟ ଭାବେ ବିଚାର କରାଯିବ ଏବଂ ପରବର୍ତ୍ତୀ ସମୟରେ ଅକ୍ଟୋବର ୨୦୨୬ ମାସର ଦରମା ସହିତ ଏହାର ଆବଶ୍ୟକୀୟ ସମାୟୋଜନ କରାଯିବ।
