ନୂଆଦିଲ୍ଲୀ: କର୍ମଚାରୀ ଭବିଷ୍ୟ ନିଧି ସଂଗଠନ ପକ୍ଷରୁ ଦେଶର ସମସ୍ତ ଯୋଗ୍ୟ ପ୍ରତିଷ୍ଠାନ ଏବଂ ପ୍ରୋଭିଡେଣ୍ଟ ଫଣ୍ଡ ଟ୍ରଷ୍ଟଗୁଡ଼ିକୁ ସେମାନଙ୍କର ଅବ୍ୟାହତି ସ୍ଥିତିର ନିୟମିତକରଣ ପାଇଁ ଆବେଦନ ପ୍ରକ୍ରିୟା ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦିଆଯାଇଛି।
‘ଆମ୍ନେଷ୍ଟି ୱିଣ୍ଡୋ’ ର ସମୟସୀମା ଶେଷ ହେବାକୁ ଆଉ ୩ ମାସରୁ କମ୍ ସମୟ ବାକି ଥିବାରୁ EPFO ଏହି ସଚେତନତା ନିର୍ଦ୍ଦେଶ ଜାରି କରିଛି। ଗତ ଜୁଲାଇ ୧୧, ୨୦୨୬ ରେ ଜାରି ହୋଇଥିବା ବିଜ୍ଞପ୍ତି ଅନୁଯାୟୀ, ଏହି ୬ ମାସିଆ ଆମ୍ନେଷ୍ଟି ସ୍କିମ୍ର ଶେଷ ତାରିଖ ଡିସେମ୍ବର ୨୮, ୨୦୨୬ ରହିଛି।
ଏକକାଳୀନ ସୁଯୋଗ: ଆୟକର ଆଇନ ଅଧୀନରେ ସ୍ୱୀକୃତିପ୍ରାପ୍ତ ହୋଇଥିବା ମାତ୍ର ‘EPF ଆକ୍ଟ’ର ସେକ୍ସନ୍ ୧୭ ଅନୁଯାୟୀ ଆନୁଷ୍ଠାନିକ ଛାଡ଼ ନଥିବା PF ଟ୍ରଷ୍ଟଗୁଡ଼ିକୁ ଏହା ଏକ ଶେଷ ସୁଯୋଗ ପ୍ରଦାନ କରୁଛି।
ଆଇନଗତ କୋହଳ: ସାମାଜିକ ସୁରକ୍ଷା ସଂହିତା ଅଧୀନରେ ଥିବା ସର୍ବନିମ୍ନ କର୍ମଚାରୀ ସଂଖ୍ୟା, ପାଣ୍ଠି ପରିମାଣ ଏବଂ ୩ ବର୍ଷର ନିୟମାବଳୀରେ କୋହଳ କରାଯାଇଛି।
କାର୍ଯ୍ୟକାରୀ ସ୍ୱାଧୀନତା: ନିୟମିତକରଣ ପରେ ପ୍ରତିଷ୍ଠାନଗୁଡ଼ିକ ଅବ୍ୟାହତିପ୍ରାପ୍ତ କିମ୍ବା ଅନ-ଏକ୍ସେମ୍ପଟେଡ୍ ଭାବେ କାର୍ଯ୍ୟ କରିବା ପାଇଁ ସମ୍ପୂର୍ଣ୍ଣ ସ୍ୱାଧୀନତା ପାଇବେ।
ଦେଶବ୍ୟାପୀ ସଚେତନତା ଓ ତଥ୍ୟ ଆଦାନପ୍ରଦାନ: ଏହି ଯୋଜନା ବିଷୟରେ ବ୍ୟାପକ ସଚେତନତା ପାଇଁ EPFO ପକ୍ଷରୁ CII, ICAI, ଏବଂ BSE ଭଳି ଶୀର୍ଷ ସଂସ୍ଥାଗୁଡ଼ିକ ସହ ମିଶି କର୍ମଶାଳା ଓ ଆଲୋଚନାଚକ୍ର ଆୟୋଜନ କରାଯାଉଛି। ଏହାସହ, ଆୟକର ବିଭାଗ ସହିତ ତଥ୍ୟ ସେୟାରିଂ ବ୍ୟବସ୍ଥା କରାଯାଇଛି, ଯାହା ଦ୍ୱାରା ଅସଂଗଠିତ ବା ନିୟମ ବାହାରେ ଥିବା ଟ୍ରଷ୍ଟଗୁଡ଼ିକୁ ସହଜରେ ଚିହ୍ନଟ କରାଯାଇପାରିବ।
ସମସ୍ତ ଯୋଗ୍ୟ PF ଟ୍ରଷ୍ଟଗୁଡ଼ିକୁ ନିଜର ଆୟକର ଛାଡ଼ ସୁବିଧା ବଜାୟ ରଖିବା ପାଇଁ ନିର୍ଦ୍ଧାରିତ ତାରିଖ ପୂର୍ବରୁ ଆବେଦନ କରିବାକୁ EPFO ଅନୁରୋଧ କରିଛି।
