ଭୁବନେଶ୍ୱର: ବଙ୍ଗୋପସାଗରରେ ଆଉ ଏକ ସମ୍ଭାବ୍ୟ ଲଘୁଚାପ ସୃଷ୍ଟି ହେବାକୁ ଯାଉଛି, ଯାହା ଘନୀଭୂତ ହୋଇ ଓଡ଼ିଶାରେ ପ୍ରବଳରୁ ଅତି ପ୍ରବଳ ବର୍ଷା (‘ରେନ୍ ଷ୍ଟର୍ମ’) କରାଇବାର ସମ୍ଭାବନା ରହିଛି। ପାଣିପାଗ ବିଶେଷଜ୍ଞଙ୍କ ଆକଳନ ଅନୁଯାୟୀ, ଆସନ୍ତା ୧୮ ତାରିଖ ବେଳକୁ ଆଣ୍ଡାମାନ ଉପକୂଳରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇ ୨୦ ତାରିଖରେ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପ ରୂପ ନେଇପାରେ।
ଏହି ସିଷ୍ଟମ୍ଟି ପରବର୍ତ୍ତୀ ସମୟରେ ଅବପାତ ଓ ଗଭୀର ଅବପାତରେ ପରିଣତ ହୋଇ ୨୪ ତାରିଖ ବେଳକୁ ଓଡ଼ିଶା ଉପକୂଳ (ସମ୍ଭବତଃ ପୁରୀରୁ ଜଗତସିଂହପୁର ମଧ୍ୟରେ) ଛୁଇଁପାରେ। ସେପ୍ଟେମ୍ବର ମାସରେ ବାତ୍ୟାର ସମ୍ଭାବନା କମ୍ ଥିଲେ ବି, ଏହା ସମୁଦ୍ର ଭିତରେ କମ୍ ସମୟ ପାଇଁ ତୀବ୍ର ରୂପ ନେବାର ସମ୍ଭାବନାକୁ ସମ୍ପୂର୍ଣ୍ଣ ଏଡ଼ାଇ ଦିଆଯାଇନପାରେ।
ରାଜ୍ୟରେ ୨୨ ତାରିଖରୁ ପାଗ ବଦଳିବ ଏବଂ ୨୩ ଅପରାହ୍ନରୁ ବର୍ଷା ଆରମ୍ଭ ହୋଇ ୨୬ ତାରିଖ ପର୍ଯ୍ୟନ୍ତ ଜାରି ରହିପାରେ। ଉପକୂଳ ଓଡ଼ିଶା ସମେତ କଟକ, ଖୋର୍ଦ୍ଧା, ନୟାଗଡ଼, ଅନୁଗୁଳ ଓ ଯାଜପୁର ଆଦି ଜିଲ୍ଲାରେ ପ୍ରବଳ ବର୍ଷା ହୋଇପାରେ।ଆନ୍ତର୍ଜାତିକ ମଡେଲ୍ GFS ଏବଂ ECMWF ଏକ ସକ୍ରିୟ ସିଷ୍ଟମ୍ ସୃଷ୍ଟିର ସଙ୍କେତ ଦେଉଛନ୍ତି।
ସୋଆ (SOA)ର ସିଇସି ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁ ଏବଂ କୃଷି ପାଣିପାଗ ବିଶାରଦ ପ୍ରଫେସର ସୁରେନ୍ଦ୍ରନାଥ ପଶୁପାଳକଙ୍କ ଅନୁଯାୟୀ, ବର୍ତ୍ତମାନ ଭୟଭୀତ ହେବାର କୌଣସି କାରଣ ନାହିଁ। କୃଷକ ଓ ସାଧାରଣ ଲୋକେ ସତର୍କ ରହିବା ଉଚିତ, ମାତ୍ର ଅଯଥା ଆତଙ୍କିତ ହୋଇ ଆଗୁଆ ଧାନ କାଟିବା କିମ୍ବା ସାମଗ୍ରୀ ମହଜୁଦ କରିବାର ଆବଶ୍ୟକତା ନାହିଁ।
