ଥିରୁବନନ୍ତପୁରମ୍: ଭୋଟ୍ ତାଲିକା ସଂଶୋଧନକୁ ନେଇ ଦେଶବ୍ୟାପୀ ଜାରି ରହିଥିବା ରାଜନୈତିକ ଘମାଘୋଟ୍ ମଧ୍ୟରେ କେରଳ ବିଧାନସଭା ଏକ ବଡ଼ ପଦକ୍ଷେପ ନେଇଛି। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ଅପସାରଣ କରାଯିବା ଦାବିରେ କେରଳ ବିଧାନସଭାରେ ଏକ ସଂକଳ୍ପ ପାସ୍ କରାଯାଇଛି।
ଭୋଟରମାନଙ୍କୁ ବାଦ୍ ଦେବା ଏବଂ ନିର୍ବାଚନ ଆୟୋଗର ନିରପେକ୍ଷତାକୁ ନେଇ ଗଭୀର ଚିନ୍ତାପ୍ରକଟ କରି ଏହି ପ୍ରସ୍ତାବ ଅଣାଯାଇଛି।
ପ୍ରସ୍ତାବର ମୁଖ୍ୟ ବିନ୍ଦୁଗୁଡ଼ିକ: ମୁଖ୍ୟମନ୍ତ୍ରୀ ଭି.ଡି. ସତୀସନଙ୍କ ଦ୍ୱାରା ଉପସ୍ଥାପିତ ଏହି ସଂକଳ୍ପରେ କୁହାଯାଇଛି ଯେ SIR ପ୍ରକ୍ରିୟା ଯୋଗୁଁ ଯୋଗ୍ୟ ଭୋଟରମାନେ ସେମାନଙ୍କ ମତଦାନ ଅଧିକାରରୁ ବଞ୍ଚିତ ହୋଇପାରନ୍ତି।
ନିର୍ବାଚନ ଆୟୋଗଙ୍କ ଏପରି ପଦକ୍ଷେପକୁ ନେଇ ଗଭୀର ଉଦବେଗ ପ୍ରକାଶ କରାଯିବା ସହ ବାଦ୍ ପଡ଼ିଥିବା ସମସ୍ତ ଯୋଗ୍ୟ ନାଗରିକଙ୍କ ମତଦାନ ଅଧିକାର ତୁରନ୍ତ ଫେରାଇଦେବାକୁ ଦାବି କରାଯାଇଛି।
ଏହାବ୍ୟତୀତ, ନିର୍ବାଚନ କମିଶନରଙ୍କ ନିଯୁକ୍ତି ପ୍ରକ୍ରିୟାରେ ପରିବର୍ତ୍ତନ ଆଣିବାକୁ ମଧ୍ୟ ପ୍ରସ୍ତାବ ଦିଆଯାଇଛି। ଚୟନ କମିଟିରେ ପ୍ରଧାନମନ୍ତ୍ରୀ, ଲୋକସଭାର ବିରୋଧୀଦଳ ନେତା ଏବଂ ଭାରତର ପ୍ରଧାନ ବିଚାରପତିଙ୍କୁ ସାମିଲ କରାଗଲେ ଆୟୋଗର ସ୍ୱାଧୀନତା ଅକ୍ଷୁର୍ଣ୍ଣ ରହିବ ବୋଲି ସଂକଳ୍ପରେ ଦର୍ଶାଯାଇଛି।
ଦେଶର ନିର୍ବାଚନୀ ବ୍ୟବସ୍ଥାର ସ୍ୱାଧୀନତା ଏବଂ ଭୋଟରଙ୍କ ଅଧିକାରକୁ ନେଇ ଏହି ପଦକ୍ଷେପ ରାଜନୈତିକ ବାତାବରଣକୁ ଆହୁରି ସରଗରମ କରିଛି।
