ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ପାଠ ପଢ଼ିବାକୁ ଆସୁଥିବା ବାହାର ଜିଲ୍ଲା ଓ ରାଜ୍ୟର ଛାତ୍ରଛାତ୍ରୀଙ୍କୁ ଭଡ଼ା ଘର ଯୋଗାଇଦେବା ନାଁରେ ଲକ୍ଷାଧିକ ଟଙ୍କାର ଠକେଇ ହୋଇଛି। ଅନ୍ଲାଇନ୍ କ୍ଲାସିଫାଇଡ୍ ପ୍ଲାଟଫର୍ମରେ ମିଥ୍ୟା ବିଜ୍ଞାପନ ଦେଇ ୭୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀଙ୍କଠାରୁ ପ୍ରାୟ ୫ ଲକ୍ଷ ଟଙ୍କା ଠକି ନେଇଥିବା ଅଭିଯୋଗରେ ନୟାପଲ୍ଲୀ ଥାନା ପୋଲିସ ବୁଧବାର ଜଣେ ମା’ ଓ ତାଙ୍କ ପୁଅଙ୍କୁ ଗିରଫ କରି କୋର୍ଟଚାଲାଣ କରିଛି।
ଗିରଫ ଅଭିଯୁକ୍ତ ଦ୍ୱୟ ହେଲେ ପାଇକନଗର ଅଞ୍ଚଳର ଡି. ସୂର୍ଯ୍ୟକୁମାରୀ (୫୬) ଏବଂ ତାଙ୍କ ପୁଅ ସିଦ୍ଧାର୍ଥ ସାମଲ (୩୩)। ଏହି ମା’-ପୁଅ ଯୋଡ଼ି ଭୁବନେଶ୍ୱରର ପାଇକନଗର ଅଞ୍ଚଳରେ ରହି ଏହି ଚଞ୍ଚକତା ଚଳାଉଥିଲେ। ସେମାନେ ପ୍ରତ୍ୟେକ ଛାତ୍ରଛାତ୍ରୀଙ୍କଠାରୁ ୧୦,୦୦୦ ଟଙ୍କାରୁ ନେଇ ୨୬,୦୦୦ ଟଙ୍କା ପର୍ଯ୍ୟନ୍ତ ଆଗ୍ରିମ ଜମା ନେଉଥିଲେ। ମାତ୍ର ଆଗ୍ରିମ ଟଙ୍କା ନେବା ପରେ ନା ଘର ହସ୍ତାନ୍ତର କରୁଥିଲେ, ନା ଟଙ୍କା ଫେରାଉଥିଲେ।
ଜଗତସିଂହପୁର ଜିଲ୍ଲା ପାରାଦୀପର ଜଣେ ଏମ୍ସିଏ ଛାତ୍ର ସେପ୍ଟେମ୍ବର ୨୯ ରେ ଏହି ବିଜ୍ଞାପନ ଦେଖି ଅଭିଯୁକ୍ତଙ୍କ ସହ ଯୋଗାଯୋଗ କରିଥିଲେ। ଅକ୍ଟୋବର ୧ ରେ ଘର ଦେଖିବା ପରେ ସେ ୮,୦୦୦ ଟଙ୍କା ଆଗ୍ରିମ ଦେଇଥିଲେ। ପରେ ଅକ୍ଟୋବର ୬ ରେ ଘର ଚାବି ଦିଆଯିବ ବୋଲି କହି ପୁଅ ଜଣକ ସମ୍ପୂର୍ଣ୍ଣ ଟଙ୍କା ମାଗିବାରୁ ସେ ମୋଟ ୧୮,୦୦୦ ଟଙ୍କା ପରିଶୋଧ କରିଥିଲେ।
ମାତ୍ର ଅକ୍ଟୋବର ୧୧ ପରଠାରୁ ବାରମ୍ବାର କାଲି-ପରଶୁ କହି ଦିନ ଗଡ଼ାଇ ଚାଲିଥିଲେ ଏବଂ ଶେଷରେ ଘର କି ଟଙ୍କା କିଛି ହେଲେ ଫେରାଇନଥିଲେ। ଅନ୍ୟ ଜଣେ ପୀଡ଼ିତ ଛାତ୍ର ୧୬,୦୦୦ ଟଙ୍କା ଆଡ଼ଭାନ୍ସ ଦେଇଥିଲେ। ଘର ନମିଳିବାରୁ ସେ ଦିନ ଦିନ ଧରି ହୋଟେଲରେ ରହି ବହୁ ଟଙ୍କା ଖର୍ଚ୍ଚ କରିଥିବା ପ୍ରକାଶ କରିଛନ୍ତି।
ଜଣେ ଛାତ୍ରୀ ଅଭିଯୋଗ କରିଛନ୍ତି ଯେ, ସେ ୟୁପିଆଇ ମାଧ୍ୟମରେ ୧୭,୦୦୦ ଟଙ୍କା ପଠାଇଥିଲେ। ଏହାପରେ ମହିଳାଜଣକ ତାଙ୍କ ପୁଅ ଦେହ ଅସୁସ୍ଥ ଅଛି କହି ଭାବପ୍ରବଣ ହୋଇ ଟଙ୍କା ମାଗିବାରୁ ଛାତ୍ରୀଙ୍କ ବାପା ଆଉ ୯,୦୦୦ ଟଙ୍କା ଦେଇଥିଲେ। ମାତ୍ର ମୋଟ ୨୬,୦୦୦ ଟଙ୍କା ନେବା ପରେ ମଧ୍ୟ ସେମାନଙ୍କୁ ଘର ମିଳିନଥିଲା।
ଏକାଧିକ ପୀଡ଼ିତ ଛାତ୍ରଛାତ୍ରୀଙ୍କ ଅଭିଯୋଗ ଆଧାରରେ ନୟାପଲ୍ଲୀ ଥାନା ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ବୁଧବାର ଚଢ଼ାଉ କରାଯାଇ ଦୁଇ ଅଭିଯୁକ୍ତଙ୍କୁ ଗିରଫ କରାଯିବା ସହ କୋର୍ଟଚାଲାଣ କରାଯାଇଛି। ରାଜଧାନୀରେ ପାଠ ପଢ଼ିବାକୁ ଆସୁଥିବା ଛାତ୍ରଛାତ୍ରୀଙ୍କୁ ଅନ୍ଲାଇନ୍ ଭଡ଼ା ଘର ସନ୍ଧାନ ସମୟରେ ସତର୍କ ରହିବାକୁ ପୋଲିସ ପରାମର୍ଶ ଦେଇଛି।
