ବାଲେଶ୍ୱର: ଦୀର୍ଘ ୫ ମାସର ବ୍ୟବଧାନ ପରେ ପୁଣି ଥରେ ପର୍ଯ୍ୟଟକ ଓ ପ୍ରକୃତିପ୍ରେମୀଙ୍କ କୋଳାହଳରେ କମ୍ପିଉଠିଛି କୁଲଡ଼ିହା ଜଙ୍ଗଲ। ବାଲେଶ୍ୱର ଜିଲ୍ଲାର ପ୍ରସିଦ୍ଧ କୁଲଡ଼ିହା ବନ୍ୟପ୍ରାଣୀ ଅଭୟାରଣ୍ୟ ବୁଧବାରଠାରୁ ପର୍ଯ୍ୟଟକଙ୍କ ପାଇଁ ଆନୁଷ୍ଠାନିକ ଭାବେ ଖୋଲିଦିଆଯାଇଛି। ଏହା ସହିତ ସହ ଉତ୍ତର ଓଡ଼ିଶାର ଏହି ପ୍ରମୁଖ ଜୈବବିବିଧତା ଅଞ୍ଚଳରେ ନୂତନ ବନ୍ୟପ୍ରାଣୀ ପର୍ଯ୍ୟଟନ ଋତୁର ଶୁଭାରମ୍ଭ ହୋଇଛି।
ସକାଳ ୯ଟାରେ ଅଭୟାରଣ୍ୟର ମୁଖ୍ୟ ଫାଟକ ଖୋଲାଯିବା ସହ ପର୍ଯ୍ୟଟକମାନଙ୍କୁ ସ୍ୱାଗତ କରାଯାଇଥିଲା। ପ୍ରକୃତିପ୍ରେମୀ ଓ ବନ୍ୟପ୍ରାଣୀ ପ୍ରେମୀମାନେ ନିଜ ନିଜ ଗାଡ଼ି ସହ ଜଙ୍ଗଲ ମଧ୍ୟକୁ ପ୍ରବେଶ କରି ପ୍ରକୃତିର ସୌନ୍ଦର୍ଯ୍ୟ ଉପଭୋଗ କରିବା ଆରମ୍ଭ କରିଛନ୍ତି। ଅଭୟାରଣ୍ୟ ଖୋଲିବା ପୂର୍ବରୁ ପର୍ଯ୍ୟଟକଙ୍କ ସୁବିଧା ଓ ନିରାପତ୍ତା ପାଇଁ ବନ ବିଭାଗ ପକ୍ଷରୁ ସମସ୍ତ ପ୍ରକାର ଆବଶ୍ୟକୀୟ ପ୍ରସ୍ତୁତି ଶେଷ କରାଯାଇଥିଲା।
ପ୍ରାୟ ୨୮୨ ବର୍ଗ କିଲୋମିଟର ପରିମିତ ସାନ୍ଦ୍ର ସାଲ, ଶିଶୁ ଏବଂ ଶିମୁଳି ଜଙ୍ଗଲରେ ପରିବ୍ୟାପ୍ତ ଏହି ଅଭୟାରଣ୍ୟ ନିଜର ପ୍ରାକୃତିକ ପରିବେଶ ଓ ସୌନ୍ଦର୍ଯ୍ୟ ପାଇଁ ସାରା ଦେଶରେ ଜଣାଶୁଣା। ଏଠାରେ ପର୍ଯ୍ୟଟକମାନେ ହାତୀପାଳ, ଚିତଲ ହରିଣ, ମାଲାବାର ଗାଏଣ୍ଟ ସ୍କ୍ୱିରେଲ୍ ଏବଂ ଅନେକ ଦୁର୍ଲଭ ପକ୍ଷୀଙ୍କୁ ନିଜ ପ୍ରାକୃତିକ ଆବାସସ୍ଥଳୀରେ ଦେଖିବାର ସୁଯୋଗ ପାଇପାରିବେ।
ନୂଆ ପର୍ଯ୍ୟଟନ ଋତୁ ଆରମ୍ଭ ହୋଇଥିବାରୁ ଏଥର ବହୁ ସଂଖ୍ୟାରେ ଫଟୋଗ୍ରାଫର, ପ୍ରକୃତିପ୍ରେମୀ ଏବଂ ଇକୋ-ଟୁରିଷ୍ଟଙ୍କ ଆଗମନ ହେବ ବୋଲି ବନ ବିଭାଗ ଆଶା ରଖିଛି।
