ମୁମ୍ବାଇ: ବଲିଉଡ୍ର ମହାନାୟକ ଅମିତାଭ ବଚ୍ଚନଙ୍କ ଏକ ସୋସିଆଲ୍ ମିଡିଆ ପୋଷ୍ଟ ଏବେ ତାଙ୍କ କୋଟି କୋଟି ପ୍ରଶଂସକଙ୍କ ମନରେ ଗଭୀର ଚିନ୍ତା ସୃଷ୍ଟି କରିଛି। ନିୟମିତ ଭାବେ ନିଜ ବ୍ଲଗ୍ ଏବଂ ସୋସିଆଲ୍ ପ୍ଲାଟଫର୍ମ ମାଧ୍ୟମରେ ପ୍ରଶଂସକଙ୍କ ସହ ଯୋଡ଼ି ହୋଇରହୁଥିବା ବିଗ୍ ବି ହଠାତ୍ ଲେଖାଲେଖିରୁ ନିଜକୁ ଦୂରେଇ ରଖିବାକୁ ଘୋଷଣା କରିଛନ୍ତି।
ନିଜର ଅଫିସିଆଲ୍ ପ୍ଲାଟଫର୍ମ ଏବଂ ବ୍ଲଗ୍ରେ ପୋଷ୍ଟ କରି ଅମିତାଭ କ୍ଷମା ପ୍ରାର୍ଥନା କରିଛନ୍ତି। ସେ କହିଛନ୍ତି ଯେ ତାଙ୍କୁ ଡାକ୍ତରମାନେ କିଛି ଦିନ କଡ଼ା ବିଶ୍ରାମ ନେବାକୁ ଏବଂ ସ୍ୱାସ୍ଥ୍ୟର ଉନ୍ନତି ପାଇଁ ସମୟ ଦେବାକୁ ପରାମର୍ଶ ଦେଇଛନ୍ତି। ଏହି କାରଣରୁ ସେ ବର୍ତ୍ତମାନ କିଛି ଲେଖିବା କିମ୍ବା ଯୋଗାଯୋଗ ରଖିବା ସ୍ଥିତିରେ ନାହାନ୍ତି। ତେବେ ସେ କୌଣସି ନିର୍ଦ୍ଦିଷ୍ଟ ସ୍ୱାସ୍ଥ୍ୟଗତ ସମସ୍ୟା ସମ୍ପର୍କରେ ସ୍ପଷ୍ଟ କରି ନାହାନ୍ତି।
ସୂଚନାଯୋଗ୍ୟ ଯେ, ନିକଟରେ ‘କୌନ୍ ବନେଗା କରୋଡ଼ପତି’ (KBC 18) ର ସୁଟିଂ ସମୟରେ ତାଙ୍କ ଆଣ୍ଠୁରେ ଆଘାତ ଲାଗିଥିବା କଥା ସେ ନିଜେ ସେୟାର କରିଥିଲେ। ତେବେ ଏହି ବିଶ୍ରାମ ଘୋଷଣା ପରେ ପ୍ରଶଂସକମାନେ ସୋସିଆଲ ମିଡିଆରେ ତାଙ୍କର ଶୀଘ୍ର ଆରୋଗ୍ୟ ଏବଂ ସୁସ୍ଥତା କାମନା କରିଛନ୍ତି।
