ସୁଲତାନପୁର: କଂଗ୍ରେସ ନେତା ତଥା ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଏକ ବଡ଼ ଆଇନଗତ ଆଶ୍ୱସ୍ତି ମିଳିଛି। ଉତ୍ତର ପ୍ରଦେଶର ସୁଲତାନପୁରସ୍ଥିତ ସ୍ୱତନ୍ତ୍ର MP/MLA କୋର୍ଟ ୨୦୧୮ ମସିହାର ଏକ ଅପରାଧିକ ମାନହାନି ମାମଲାରେ ରାହୁଲ ଗାନ୍ଧୀଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।
କୋର୍ଟ ନିଜ ନିର୍ଦ୍ଦେଶରେ ସ୍ପଷ୍ଟ କରିଛନ୍ତି ଯେ ରାହୁଲ ଗାନ୍ଧୀଙ୍କ ବକ୍ତବ୍ୟରେ କୌଣସି ଅପରାଧିକ ମାନହାନିର ତଥ୍ୟ କିମ୍ବା ପ୍ରମାଣ ମିଳିନାହିଁ। ବିଚାରପତି ଶୁଭମ ବର୍ମା ଏହି ରାୟ ପ୍ରକାଶ କରିବା ସମୟରେ ରାହୁଲ ଗାନ୍ଧୀ କୋର୍ଟ ପରିସରରେ ଉପସ୍ଥିତ ଥିଲେ। ରାୟ ପ୍ରକାଶ ପାଇବା ପରେ କଂଗ୍ରେସ କର୍ମୀମାନେ “ସତ୍ୟମେବ ଜୟତେ” ନାରା ଦେଇ କୋର୍ଟ ବାହାରେ ଉତ୍ସବ ପାଳନ କରିଥିଲେ।
୨୦୧୮ କର୍ଣ୍ଣାଟକ ନିର୍ବାଚନ ପ୍ରଚାର ସମୟରେ ବେଙ୍ଗାଲୁରୁଠାରେ ବିଜେପିର ତତ୍କାଳୀନ ଅଧ୍ୟକ୍ଷ ତଥା ବର୍ତ୍ତମାନର ଗୃହମନ୍ତ୍ରୀ ଅମିତ ଶାହଙ୍କ ସମ୍ପର୍କରେ ରାହୁଲ ଦେଇଥିବା ଟିପ୍ପଣୀକୁ ନେଇ ବିଜେପି ନେତା ବିଜୟ ମିଶ୍ର ୨୦୧୮ ଅଗଷ୍ଟ ୪ ରେ ଏହି ମାମଲା ଦାୟର କରିଥିଲେ।
ରାହୁଲ ଗାନ୍ଧୀଙ୍କ ଆଇନଜୀବୀ କୋର୍ଟରେ ଯୁକ୍ତି ଦର୍ଶାଇଥିଲେ ଯେ ଏହି ବକ୍ତବ୍ୟ କାାହାରିକୁ ଅପମାନିତ କରିବା ଉଦ୍ଦେଶ୍ୟରେ ଦିଆଯାଇ ନଥିଲା, ବରଂ ଏହାକୁ ଭୁଲ୍ ଭାବେ ଉପସ୍ଥାପନ କରାଯାଇଥିଲା ।
ଏହି ଦୀର୍ଘ ୮ ବର୍ଷର ଆଇନଗତ ଲଢ଼େଇରେ ରାହୁଲ ଗାନ୍ଧୀ ୨୦୨୪ ଫେବୃଆରୀରେ କୋର୍ଟରେ ଆତ୍ମସମର୍ପଣ କରି ଜାମିନ ପାଇଥିଲେ। ଆଜି ଅକ୍ଟୋବର ୨୬ ରେ ସ୍ୱତନ୍ତ୍ର କୋର୍ଟ ଏହି ମାମଲାରେ ସମସ୍ତ ଅଭିଯୋଗକୁ ଖାରଜ କରି ତାଙ୍କୁ ମୁକ୍ତ କରିଛନ୍ତି।ଏହି ବିଜୟ ପରେ କଂଗ୍ରେସ ଦଳ ପକ୍ଷରୁ କୁହାଯାଇଛି ଯେ, “ଶେଷରେ ସତ୍ୟର ହିଁ ଜୟ ହୋଇଛି”।
