ୱାଶିଂଟନ୍: ଆମେରିକାର ମିଡ୍-ଟର୍ମ ନିର୍ବାଚନରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ତାଙ୍କ ରିପବ୍ଲିକାନ୍ ପାର୍ଟିକୁ ବଡ଼ ଝଟକା ଲାଗିଛି। ଦ୍ୱିତୀୟ ଥର ପାଇଁ କ୍ଷମତାସୀନ ଟ୍ରମ୍ପ ପ୍ରଶାସନର ମଧ୍ୟଭାଗରେ ଏହି ନିର୍ବାଚନୀ ଫଳାଫଳ ଆସିଥିବା ବେଳେ, ଡେମୋକ୍ରାଟିକ୍ ପାର୍ଟି ସଂସଦର ନିମ୍ନ ସଦନ ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସ ଏବଂ ଉଚ୍ଚ ସଦନ ସେନେଟ୍ ଉଭୟ ଗୃହରେ ବହୁମତ ହାସଲ କରିବା ସହ ଏକ ଐତିହାସିକ ବିଜୟ ଆଡ଼କୁ ଅଗ୍ରସର ହୋଇଛି।
ପ୍ରମୁଖ ଆମେରିକୀୟ ଗଣମାଧ୍ୟମ ଏବଂ ଆସୋସିଏଟେଡ୍ ପ୍ରେସ୍ ର ପୂର୍ବାନୁମାନ ଅନୁଯାୟୀ, ନିତ୍ୟବ୍ୟବହାର୍ଯ୍ୟ ସାମଗ୍ରୀର ଅନିୟନ୍ତ୍ରିତ ମୂଲ୍ୟ ବୃଦ୍ଧି, ଟ୍ରମ୍ପଙ୍କ ଟ୍ୟାରିଫ୍ ନୀତି ଏବଂ ଇରାନ ସହ ଚାଲିଥିବା ସାମରିକ ସଂଘର୍ଷ ଯୋଗୁଁ ତୈଳ ଦର ବୃଦ୍ଧି ପାଇବା ବିରୋଧରେ ଜନସାଧାରଣ ନିଜର ମତ ସାବ୍ୟସ୍ତ କରିଛନ୍ତି। ଏହି ବିଜୟ ଫଳରେ ଟ୍ରମ୍ପଙ୍କ ବହୁ ବିଲ୍ ଗୃହୀତ ହେବାରେ ସମସ୍ୟା ସୃଷ୍ଟି ହେବା ସହ ତାଙ୍କ ବିଭାଗୀୟ ନୀତିଗୁଡ଼ିକର କଂଗ୍ରେସୀୟ ତଦନ୍ତ ପାଇଁ ବାଟ ଖୋଲିଯାଇଛି।
ପାରମ୍ପରିକ ଭାବେ ରିପବ୍ଲିକାନ୍ ଦୁର୍ଗ ଭାବେ ଜଣାଶୁଣା ସାଉଥ୍ କାରୋଲିନାରୁ ସବୁଠାରୁ ବଡ଼ ସରପ୍ରାଇଜ୍ ଆସିଛି। ସେଠାରେ ଡେମୋକ୍ରାଟିକ୍ ଦଳର ଶିଶୁରୋଗ ବିଶେଷଜ୍ଞ ଡକ୍ଟର ଆନି ଆଣ୍ଡ୍ରିୟୁଜ୍, ଟ୍ରମ୍ପଙ୍କ ସମର୍ଥିତ ରିପବ୍ଲିକାନ୍ ପ୍ରାର୍ଥୀ ଡାର୍ଲିନ୍ ଗ୍ରାହାମଙ୍କୁ ପରାସ୍ତ କରି ସେନେଟ୍ ଆସନ ହାତେଇଛନ୍ତି।
ନର୍ଥ କାରୋଲିନାରେ ପୂର୍ବତନ ରାଜ୍ୟପାଳ ରୟ କୁପର ଏବଂ ଜୋର୍ଜିଆରେ ଜନ୍ ଓସୋଫ୍ ନିଜ ସେନେଟ୍ ଆସନ ବଜାୟ ରଖିଛନ୍ତି। କ୍ରିସ୍ ପାପାସ ସେନେଟ୍କୁ ନିର୍ବାଚିତ ହୋଇଥିବା ପ୍ରଥମ ପ୍ରକାଶ୍ୟ ସମଲିଙ୍ଗୀ ବ୍ୟକ୍ତି ଭାବେ ଇତିହାସ ରଚିଛନ୍ତି।
ଜୋର୍ଜିଆ ରାଜ୍ୟପାଳ ନିର୍ବାଚନରେ ଆଟଲାଣ୍ଟାର ପୂର୍ବତନ ମେୟର କିଶା ଲାନ୍ସ ବଟମ୍ସ ବିଜୟୀ ହୋଇଛନ୍ତି। ସେ ଆମେରିକା ଇତିହାସରେ ରାଜ୍ୟପାଳ ଭାବେ ନିର୍ବାଚିତ ହୋଇଥିବା ପ୍ରଥମ କୃଷ୍ଣକାୟ ମହିଳା ସାଜିଛନ୍ତି। ଏହା ସହ ସେଠାରେ ଦୀର୍ଘ ୨୪ ବର୍ଷର ରିପବ୍ଲିକାନ୍ ଶାସନର ଅନ୍ତ ଘଟିଛି।
ଇଣ୍ଡିଆନାରେ ଡେମୋକ୍ରାଟିକ୍ ନେତା ଜେଡି ଫୋର୍ଡ, ରିପବ୍ଲିକାନ୍ ଭିକ୍ଟୋରିଆ ସ୍ପାର୍ଟଜ୍ଙ୍କୁ ପରାସ୍ତ କରିବା ଏବଂ ନର୍ଥ କାରୋଲିନାରେ ଆସନ ସ୍ନାଚ୍ କରିବା ଡେମୋକ୍ରାଟିକ୍ ଦଳର ବଡ଼ ସଫଳତାକୁ ଦର୍ଶାଉଛି।
ନିର୍ବାଚନ ଫଳାଫଳ ପରେ ହ୍ୱାଇଟ୍ ହାଉସ୍ ପକ୍ଷରୁ ପ୍ରତିକ୍ରିୟା ରଖାଯାଇ କୁହାଯାଇଛି ଯେ, ରାଷ୍ଟ୍ରପତି ଟ୍ରମ୍ପ ଡେମୋକ୍ରାଟ୍ଙ୍କ କୌଣସି ପ୍ରସ୍ତାବକୁ ସହଜରେ ଗ୍ରହଣ କରିବେ ନାହିଁ ଏବଂ ଆବଶ୍ୟକ ପଡ଼ିଲେ ଭେଟୋ କ୍ଷମତା ପ୍ରୟୋଗ କରିବେ, ଯଦିଓ ସେ ବିରୋଧୀଙ୍କ ସହ ଆଲୋଚନାର ଦ୍ୱାର ଖୋଲା ରଖିଛନ୍ତି।
