ଭୁବନେଶ୍ୱର: ଆଶ୍ୱିନ ମାସ କୃଷ୍ଣପକ୍ଷ ଅଷ୍ଟମୀ ତଥା ମୂଳାଷ୍ଟମୀ ଅବସରରୁ ରାଜ୍ୟର ସମସ୍ତ ଶକ୍ତିପୀଠରେ ଶକ୍ତି ଆରାଧନା ଆରମ୍ଭ ହୋଇଛି। ମୂଳାଷ୍ଟମୀଠାରୁ ବିଜୟା ଦଶମୀ ପର୍ଯ୍ୟନ୍ତ ଚାଲିବାକୁଥିବା ଏହି ଷୋଡ଼ଶ ଉପଚାର ପୂଜା ପାଇଁ ଚଳଚଞ୍ଚଳ ହୋଇଉଠିଛି ଶ୍ରୀକ୍ଷେତ୍ର ଓ ଅନ୍ୟାନ୍ୟ ଦେବୀପୀଠ।
ଶ୍ରୀକ୍ଷେତ୍ରର ଅଧିଷ୍ଠାତ୍ରୀ ମା’ ବିମଳାଙ୍କ ପୀଠରେ ଆଜିଠାରୁ ଷୋଡ଼ଶ ଦିନାତ୍ମକ ପୂଜା ଆରମ୍ଭ ହୋଇଛି। ମୂଳାଷ୍ଟମୀ ଅବସରରେ ମା’ଙ୍କୁ ସହସ୍ର କୁମ୍ଭାଭିଷେକ କରାଯିବା ସହ ନିଦ୍ରାରୁ ଜାଗ୍ରତ କରାଯାଇ ଘଟ ସ୍ଥାପନ ଓ ଆବାହନ କରାଯାଇଛି। ଏହି ପୂଜା ନିମନ୍ତେ ଗଜପତି ମହାରାଜାଙ୍କ ଶ୍ରୀନଅରରେ ୨୧ ଜଣ ଶ୍ରୋତ୍ରୀୟ ବ୍ରାହ୍ମଣଙ୍କୁ ଆଚାର୍ଯ୍ୟ ବରଣ କରାଯାଇଛି।
ରାଜଗୁରୁ ପୁରୋହିତଙ୍କୁ ଗଜପତିଙ୍କ ଶ୍ରୀହସ୍ତ ଛୁଆଁ ଗୁଆ ନଡ଼ିଆ ପ୍ରଦାନ କରିବା ପରେ, ଗଜପତିଙ୍କ ପ୍ରତିନିଧି ଭାବେ ରାଜଗୁରୁ ବ୍ରାହ୍ମଣମାନଙ୍କୁ ବରଣ କରିଛନ୍ତି। ମା’ ବିମଳାଙ୍କ ପୀଠ ପାଇଁ ପୂଜକ, ପରିଛା, ଚଣ୍ଡୀପାଠକ, ମନ୍ତ୍ରଯାପକ ଓ ସହସ୍ରନାମ ପାଠକଙ୍କୁ ବରଣ କରାଯିବାର ପରମ୍ପରା ରହିଛି।
ସେହିପରି ଶ୍ରୀମନ୍ଦିର ଭିତର ବେଢା ପରିସରରେ ଥିବା ମା’ ଭୁବନେଶ୍ୱରୀ, ମା’ ବାଟମଙ୍ଗଳା ଏବଂ ମା’ ଉତ୍ତରାୟଣୀ ପୀଠ ପାଇଁ ମଧ୍ୟ ପୂଜକ ଓ ଚଣ୍ଡୀପାଠକ ବରଣ ହୋଇଛନ୍ତି। ଏହାଛଡ଼ା ଶ୍ରୀକ୍ଷେତ୍ରର ଅନ୍ୟାନ୍ୟ ଶକ୍ତିପୀଠ ଯଥା ଦକ୍ଷିଣକାଳୀ, ଆଲମଚଣ୍ଡୀ ଏବଂ କପିଳେଶ୍ୱରପୁର ଶାସନର ପଞ୍ଚମୁଖୀ ଠାକୁରାଣୀଙ୍କ ପୀଠରେ ମଧ୍ୟ ଷୋଳପୂଜା ପାଇଁ ସ୍ୱତନ୍ତ୍ର ନୀତିକାନ୍ତି ଅନୁଷ୍ଠିତ ହେଉଛି।
ଶାରଦୀୟ ଦୁର୍ଗାପୂଜା ଅବସରରେ ସାରାଜ୍ଞାତରେ ମା’ ଦୁର୍ଗାଙ୍କ ପୂଜା ଚାଲିଥିବା ବେଳେ ଶ୍ରୀମନ୍ଦିରରେ ଶାକ୍ତ ଓ ଶକ୍ତିଙ୍କ ମିଳିତ ଉପସନା ସ୍ୱରୂପ ‘ଦୁର୍ଗାମାଧବ’ ଏକତ୍ର ଉପାସନାର ଅନନ୍ୟ ପରମ୍ପରା ପାଳନ କରାଯାଉଛି।
