ନୂଆଦିଲ୍ଲୀ: ୟୁପିଆଇ (UPI) କାରବାର ଉପରେ ଶୁଳ୍କ ଲାଗିବା ନେଇ ଚାଲିଥିବା ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ପକାଇଛନ୍ତି କେନ୍ଦ୍ର ସରକାର। ଗଜଟ୍ ବିଜ୍ଞପ୍ତି ଜାରି କରି ଅର୍ଥ ମନ୍ତ୍ରଣାଳୟ ସ୍ପଷ୍ଟ କରିଛି ଯେ ୨,୦୦୦ ଟଙ୍କା ପର୍ଯ୍ୟନ୍ତ ୟୁପିଆଇ କାରବାର ଏବଂ ରୁପେ (RuPay) ଡେବିଟ୍ କାର୍ଡ ମାଧ୍ୟମରେ କରାଯାଉଥିବା କାରବାର ଉପରେ ବ୍ୟାଙ୍କ କିମ୍ବା ପେମେଣ୍ଟ ସିଷ୍ଟମ ପ୍ରୋଭାଇଡର କୌଣସି ପ୍ରତ୍ୟକ୍ଷ କିମ୍ବା ପରୋକ୍ଷ ଶୁଳ୍କ ଆଦାୟ କରିପାରିବେ ନାହିଁ।
‘ପେମେଣ୍ଟ ଆଣ୍ଡ ସେଟଲମେଣ୍ଟ ସିଷ୍ଟମ ଆକ୍ଟ, ୨୦୦୭’ ର ସେକ୍ସନ ୧୦A ଅଧୀନରେ ନିୟମ ସଂଶୋଧନ କରି ସରକାର ଏହି ଦୁଇଟି ମାଧ୍ୟମକୁ “ଇଲେକ୍ଟ୍ରୋନିକ୍ ମୋଡ୍ ଅଫ୍ ପେମେଣ୍ଟ” ଭାବେ ନୋଟିଫାଇ କରିଛନ୍ତି।
ଗ୍ରାହକ ଓ ବ୍ୟବସାୟୀଙ୍କ ପାଇଁ ନିୟମ: ବ୍ୟକ୍ତି-ରୁ-ବ୍ୟକ୍ତି (P2P) ସମସ୍ତ ୟୁପିଆଇ କାରବାର ସମ୍ପୂର୍ଣ୍ଣ ମାଗଣା ରହିବ। ଗ୍ରାହକଙ୍କ ଉପରେ କୌଣସି ଚାର୍ଜ ପଡ଼ିବ ନାହିଁ।
ମର୍ଚାଣ୍ଟ ଡିସକାଉଣ୍ଟ ରେଟ୍ (MDR): ୨,୦୦୦ ଟଙ୍କାରୁ ଅଧିକ ମୂଲ୍ୟର କିଛି ନିର୍ଦ୍ଦିଷ୍ଟ ବ୍ୟବସାୟିକ କାରବାର (P2M) ଉପରେ ଭବିଷ୍ୟତରେ ସୀମିତ ଏମ୍ଡିଆର୍ (MDR) ଲାଗୁ ହୋଇପାରେ, ତେବେ ଏହା ଡେବିଟ୍ କିମ୍ବା କ୍ରେଡିଟ୍ କାର୍ଡ ତୁଳନାରେ ବହୁତ କମ୍ ରହିବ।
ଭ୍ରମାତ୍ମକ ଖବରର ଅନ୍ତ: ନିକଟରେ ସଂସଦରେ ଏହି ଆଇନ ସଂଶୋଧିତ ହେବା ପରେ ୟୁପିଆଇ ବ୍ୟବହାରକାରୀଙ୍କ ଉପରେ ଶୁଳ୍କ ଲାଗିବା ନେଇ ଦ୍ୱନ୍ଦ୍ୱ ସୃଷ୍ଟି ହୋଇଥିଲା, ଯାହାକୁ ଅର୍ଥ ମନ୍ତ୍ରଣାଳୟ ସମ୍ପୂର୍ଣ୍ଣ ଦୂର କରିଛି।
