ମୁମ୍ବାଇ: ଭାରତୀୟ ସ୍ୟାଟେଲାଇଟ୍ କମ୍ୟୁନିକେସନ୍ ବଜାରକୁ ନେଇ ଚାଲିଥିବା ବିବାଦ ମଧ୍ୟରେ ଏଲନ୍ ମସ୍କଙ୍କ ସଂସ୍ଥା ଷ୍ଟାରଲିଙ୍କ୍ କୁ କଡ଼ା ଜବାବ ଦେଇଛି ରିଲାୟାନ୍ସ ଇଣ୍ଡଷ୍ଟ୍ରିଜ୍। ଶୁକ୍ରବାର ଜାରି ଏକ ବିବୃତ୍ତିରେ କମ୍ପାନୀ ସ୍ପଷ୍ଟ କରିଛି ଯେ, ରିଲାୟାନ୍ସ କେବେ ବି ପ୍ରତିଯୋଗିତାକୁ ଭୟ କରେନାହିଁ ବରଂ ଏହାକୁ ସ୍ୱାଗତ କରେ। ତେବେ ଦେଶର ନିୟମ ଓ ନିୟାମକୀୟ ଢାଞ୍ଚା ଦେଶୀ ଏବଂ ବିଦେଶୀ ସମସ୍ତ କମ୍ପାନୀ ପାଇଁ ସମାନ ହେବା ଆବଶ୍ୟକ ବୋଲି ଜିଓ ଦୋହରାଇଛି।
ରିଲାୟାନ୍ସ ଦର୍ଶାଇଛି ଯେ, ଜିଓର ନିଜସ୍ୱ ସ୍ୟାଟେଲାଇଟ୍ କମ୍ୟୁନିକେସନ୍ ସେବା ମଧ୍ୟ ସରକାରୀ ଓ ନିୟାମକୀୟ ଅନୁମୋଦନ ପାଇଁ ଅପେକ୍ଷା କରିରହିଛି। ଭାରତ ସରକାର ଯେପରି ସମସ୍ତ ଆବେଦନକାରୀଙ୍କ ପାଇଁ ଏକ ସମାନ ପ୍ରକ୍ରିୟା ଅନୁସରଣ କରୁଛନ୍ତି, ତାହା ପ୍ରଶଂସନୀୟ। ଘରୋଇ ହେଉ କି ବିଦେଶୀ, ପ୍ରତ୍ୟେକ କମ୍ପାନୀକୁ ଭାରତର ଆଇନ ଓ ନୀତିନିୟମ ମାନି ଚଳିବାକୁ ପଡ଼ିବ।
କମ୍ପାନୀ ପ୍ରତିଯୋଗିତାର ଶ୍ରେଷ୍ଠ ନମୁନା ଭାବେ ନିଜର ଯାତ୍ରାକୁ ଉଦାହରଣ ଭାବେ ଉପସ୍ଥାପନ କରିଛି। ୨୦୧୬ ମସିହାରେ ଜିଓ ଯେତେବେଳେ ଭାରତୀୟ ଟେଲିକମ୍ ବଜାରରେ ପ୍ରବେଶ କରିଥିଲା, ସେତେବେଳେ ଏହାର ଗୋଟିଏ ହେଲେ ବି ଗ୍ରାହକ ନଥିଲେ। ମାତ୍ର ୧୦ ବର୍ଷ ମଧ୍ୟରେ ନିଜର ଗୁଣାତ୍ମକ ସେବା ଓ ସସ୍ତା ଡାଟା ବଳରେ ଜିଓ ୫୩୦ ମିଲିୟନ୍ (୫୩ କୋଟି) ରୁ ଅଧିକ ଗ୍ରାହକଙ୍କ ଭରସା ଜିତିପାରିଛି।
ଗ୍ରାହକଙ୍କୁ ସର୍ବୋତ୍ତମ ସେବା ଯୋଗାଇବାରେ ପ୍ରତିଯୋଗିତା ହେଉଛି ସବୁଠାରୁ ବଡ଼ କସୋଟି। ତେଣୁ ସ୍ୟାଟେଲାଇଟ୍ ବ୍ରଡବ୍ୟାଣ୍ଡ ବଜାରରେ ଷ୍ଟାରଲିଙ୍କ୍ ସହ ଅନ୍ୟ ସମସ୍ତ କମ୍ପାନୀର ଆଗମନକୁ ରିଲାୟାନ୍ସ ସ୍ୱାଗତ କରୁଥିବା ବେଳେ ନିୟମାବଳୀର ସମାନତା ଉପରେ ଗୁରୁତ୍ୱାରୋପ କରିଛି।
