ନୂଆଦିଲ୍ଲୀ: କକ୍ରୋଚ୍ ଜନତା ପାର୍ଟିର ପ୍ରତିଷ୍ଠାତା ଅଭିଜିତ୍ ଦିପ୍କେ ଦଳର ସମର୍ଥକ ଏବଂ କର୍ମୀମାନଙ୍କୁ ଆଗାମୀ ପର୍ବପର୍ବାଣୀକୁ ଦୃଷ୍ଟିରେ ରଖି ପ୍ରତିବାଦରୁ କିଛି ସମୟ ପାଇଁ ବିରତ ରହିବା ଏବଂ ପରିବାର ସହ ସମୟ ବିତାଇବାକୁ ଅନୁରୋଧ କରିଛନ୍ତି। ଏକ ଭିଡିଓ ବାର୍ତ୍ତା ଜରିଆରେ ସେ ଏହି ଆହ୍ୱାନ ଦେଇଛନ୍ତି।
ନିଜର ଭିଡିଓ ବାର୍ତ୍ତାରେ ଅଭିଜିତ୍ ଦିପ୍କେ ଜେଲ୍ରେ ଥିବା CJP ନେତା ସୌରଭ ଦାସ ଏବଂ ଆଶୁତୋଷ ରାଙ୍କାଙ୍କ ଭୂମିକାକୁ ଅତ୍ୟନ୍ତ ପ୍ରଶଂସା କରିଛନ୍ତି। ସେମାନଙ୍କୁ ଆନ୍ଦୋଳନର ‘ପ୍ରକୃତ ନେତା’ ବୋଲି ବର୍ଣ୍ଣନା କରି ଦିପ୍କେ କହିଛନ୍ତି ଯେ, ଯଦିଓ ସେ ନିଜେ ସାମାଜିକ ଗଣମାଧ୍ୟମ ଏବଂ ସାମ୍ନାରେ ମୁଖ୍ୟ ଚେହେରା, କିନ୍ତୁ ପ୍ରକୃତ ଦିଗ୍ଦର୍ଶନ ଏବଂ ନିଷ୍ପତ୍ତି ନେବାରେ ଏହି ଦୁଇ ନେତାଙ୍କର ବଡ଼ ଅବଦାନ ରହିଛି।
ମୁଖ୍ୟ ନିର୍ବାଚନ କମିଶନରଙ୍କ ଇସ୍ତଫା ଦାବି ଏବଂ ନିର୍ବାଚନୀ ତାଲିକା ସଂଶୋଧନ କୁ ନେଇ CJP ପକ୍ଷରୁ ଚାଲିଥିବା ଅଭିଯାନ ମଧ୍ୟରେ ଏହି ବାର୍ତ୍ତା ଆସିଛି। ଦିପ୍କେ ସ୍ପଷ୍ଟ କରିଛନ୍ତି ଯେ, ସମର୍ଥକମାନେ ପରିବାରକୁ ସମୟ ଦେବା ଉଚିତ୍ ଏବଂ ଆନ୍ଦୋଳନକୁ ଦୀପାବଳି ପର୍ଯ୍ୟନ୍ତ ସ୍ଥଗିତ ରଖାଯିବା ଉଚିତ୍। ଏହା ସହିତ ସେ ଫ୍ରାନ୍ସ, ନେପାଳ ବା ବାଂଲାଦେଶର ପ୍ରତିବାଦ ସହ CJP ର ତୁଳନାକୁ ଖଣ୍ଡନ କରି ମହାତ୍ମା ଗାନ୍ଧୀଙ୍କ ଅହିଂସା ଏବଂ ଶାନ୍ତିପୂର୍ଣ୍ଣ ମାର୍ଗକୁ ଅନୁସରଣ କରିବାକୁ ପରାମର୍ଶ ଦେଇଛନ୍ତି।
ଦୀପାବଳି ପରେ ଦଳର ପରବର୍ତ୍ତୀ ରଣନୀତି କ’ଣ ହେବ ଏବଂ ଆଇନଗତ ଲଢ଼େଇ କିପରି ଆଗକୁ ବଢ଼ିବ, ତାହା ଉପରେ ଏବେ ସମସ୍ତଙ୍କ ନଜର ରହିଛି।
