ଉତ୍ତର-ପଶ୍ଚିମ ଚୀନ୍ର ଗାଂସୁ ପ୍ରଦେଶର ଏକ ପର୍ଯ୍ୟଟନସ୍ଥଳରେ ହଠାତ୍ ବନ୍ୟା ମାଡ଼ି ଆସିବାରୁ ୧୦ ଜଣଙ୍କ ମୃତ୍ୟୁ ଓ ୨୩ ଜଣ ଆହତ ହୋଇଛନ୍ତି। ରବିବାର ଅପରାହ୍ନରେ ଅଳ୍ପ ସମୟ ମଧ୍ୟରେ ପ୍ରବଳ ବର୍ଷା ପରେ ଏହି ଘଟଣା ଘଟିଛି।
ସ୍ଥାନୀୟ ରିପୋର୍ଟ ଅନୁସାରେ, ଡିଙ୍ଗସି ସହରର ୱେଇୟୁଆନ୍ କାଉଣ୍ଟିର ଶୁଆଙ୍ଗଶିମେନ୍ ପର୍ଯ୍ୟଟନ ଅଞ୍ଚଳରେ ଅନେକ ପର୍ଯ୍ୟଟକ କ୍ୟାମ୍ପିଂ କରୁଥିଲେ। ପାହାଡ଼ିଆ ଅଞ୍ଚଳରୁ ହଠାତ୍ ଜଳସ୍ରୋତ ଆସିବାରୁ ସେମାନେ ଫସିଯାଇଥିଲେ।
ଉଦ୍ଧାରକାରୀ ଦଳ ଘଟଣାସ୍ଥଳରୁ ୧୭୪ ଜଣଙ୍କୁ ସୁରକ୍ଷିତ ଭାବେ ବାହାର କରିଛନ୍ତି। ଆହତମାନଙ୍କୁ ନିକଟସ୍ଥ ହସ୍ପିଟାଲକୁ ପଠାଯାଇଥିବାବେଳେ ଖୋଜାଖୋଜି ଓ ସୁରକ୍ଷା କାର୍ଯ୍ୟ ଜାରି ରହିଛି।
ଏହି ପର୍ଯ୍ୟଟନସ୍ଥଳ ପାହାଡ଼, ପ୍ରାକୃତିକ ପଥର ତୋରଣ, ଘାସଭୂମି ଓ ଜଳପ୍ରପାତ ପାଇଁ ପରିଚିତ। ବର୍ଷା ସମୟରେ ଏପରି ଦୁର୍ଗମ ଅଞ୍ଚଳରେ ଜଳସ୍ତର ଅତି ଶୀଘ୍ର ବଢ଼ିବାରୁ ପୂର୍ବ ସତର୍କତା ପାଇଁ ସମୟ କମ୍ ମିଳିଥାଏ।
ଦକ୍ଷିଣ ଚୀନ୍ର ଅନେକ ଅଞ୍ଚଳରେ ମଧ୍ୟ ପ୍ରବଳ ବର୍ଷା ଓ ବନ୍ୟା ସତର୍କତା ଜାରି ହୋଇଛି। ଗାଂସୁ ଘଟଣାର କ୍ଷୟକ୍ଷତି ଆକଳନ ସହ ପ୍ରଭାବିତ ଅଞ୍ଚଳରେ ଆହୁରି ବର୍ଷା ହେବ କି ନାହିଁ, ସେଥିପାଇଁ ପାଣିପାଗ ଉପରେ ନଜର ରଖାଯାଇଛି।
ସୂତ୍ର: Xinhua | Argus News
