ଭବାନୀପାଟଣା: ସୀତଦିନିଆ ପର୍ଯ୍ୟଟନ ଋତୁ ଆରମ୍ଭ ସହ କଳାହାଣ୍ଡି ଜିଲ୍ଲାର ପ୍ରାକୃତିକ ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଆକୃଷ୍ଟ କରିବାରେ ଲାଗିଛି। ସବୁଜିମା ଭରା ପାହାଡ଼, ଘଞ୍ଚ ଜଙ୍ଗଲ ଏବଂ ୩୦ରୁ ଅଧିକ ଜଳପ୍ରପାତରେ ପରିପୂର୍ଣ୍ଣ ଏହି ଜିଲ୍ଲାରେ ପର୍ଯ୍ୟଟନର ଅପାର ସମ୍ଭାବନା ରହିଛି। ଭବାନୀପାଟଣାରୁ ମାତ୍ର ୧୨ କିମି ଦୂରରେ ଅବସ୍ଥିତ କର୍ଲାପାଟ ଅଭୟାରଣ୍ୟ, ଫୁର୍ଲିଝରନ, ରବଣଧାର, ଏବଂ ଡୋକରୀଚଞ୍ଚରା ଭଳି ପ୍ରସିଦ୍ଧ ପର୍ଯ୍ୟଟନ ସ୍ଥଳୀଗୁଡ଼ିକରେ ବାର୍ଷିକ ଲକ୍ଷାଧିକ ପର୍ଯ୍ୟଟକଙ୍କ ଆଗମନ ହେଉଛି।
ଫୁର୍ଲିଝରନ: ୧୬ ମିଟର ଉଚ୍ଚତାର ଏହି ନିତ୍ୟବହ ଜଳପ୍ରପାତଟି ସୂର୍ଯ୍ୟକିରଣରେ ସୃଷ୍ଟି ହେଉଥିବା ଇନ୍ଦ୍ରଧନୁର ଶୋଭା ପାଇଁ ବିଖ୍ୟାତ। ପ୍ରତିବର୍ଷ ଏଠାକୁ ୨ ଲକ୍ଷରୁ ଅଧିକ ପର୍ଯ୍ୟଟକ ଆସିଥାନ୍ତି।
ରବଣଧାର ଓ ଭଟାଙ୍ଗପଦର: ଘଞ୍ଚ ଜଙ୍ଗଲ ଘେରା ରବଣଧାର ଜଳପ୍ରପାତ ନିକଟରେ ଉତ୍ତର ବନଖଣ୍ଡ ପକ୍ଷରୁ ନେଚର କ୍ୟାମ୍ପ ନିର୍ମାଣ କରାଯାଇଛି, ଯାହା ଇକୋ-ଟୁରିଜିମ୍କୁ ବୃଦ୍ଧି କରୁଛି।
ଡୋକରୀ ଦର ଓ ଭାଇଁରାଘୁମର: ସହଜଖୋଲ ଜଙ୍ଗଲରେ ଅବସ୍ଥିତ ଏହି ଦୁଇଟି ପ୍ରପାତ ଏବଂ ନିକଟସ୍ଥ ଗୁଡ଼ାହାଣ୍ଡି ପ୍ରାଗୈତିହାସିକ ଗୁମ୍ଫା ଚିତ୍ରକଳା ପର୍ଯ୍ୟଟକଙ୍କ ମୁଖ୍ୟ ଆକର୍ଷଣ। ଏଠାରେ ପ୍ରଭୁ ଶ୍ରୀରାମଙ୍କ ବନବାସ ସମୟର ପୌରାଣିକ ସ୍ମୃତି ଯୋଡ଼ି ହୋଇରହିଛି।
ଲୁକ୍କାୟିତ ପ୍ରପାତ (ସିନ୍ଦରଝର, ଗୋବରଗୋଲା, ରାମକାଶୀ): ଥୁଆମୂଳ ରାମପୁର ବ୍ଲକର ସିନ୍ଦରଝର, ଜୁନାଗଡ଼ ନିକଟସ୍ଥ ଗୋବରଗୋଲା, ଏବଂ ୫ କିମି ପାହାଡ଼ିଆ ରାସ୍ତା ଅତିକ୍ରମ କରି ପହଞ୍ଚିବାକୁ ପଡ଼ୁଥିବା ରାମକାଶୀ ଜଳପ୍ରପାତ ଏବେବି ସରକାରୀ ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇବା ପାଇଁ ଅପେକ୍ଷା କରିଛନ୍ତି।
ରାସ୍ତାଘାଟ, ବିଜୁଳି, ମୋବାଇଲ୍ ନେଟୱାର୍କ ଏବଂ ଭୌତିକ ଭିତ୍ତିଭୂମିର ଅଭାବ ଯୋଗୁଁ ଅନେକ ଦୁର୍ଗମ ସ୍ଥଳୀ ପର୍ଯ୍ୟଟକଙ୍କ ପାଇଁ କଷ୍ଟକର ହେଉଛି। ସ୍ଥାନୀୟ ପ୍ରଶାସନ ଓ ପର୍ଯ୍ୟଟନ ବିଭାଗ ପକ୍ଷରୁ ସଠିକ୍ ଯୋଜନା ଓ ଭିତ୍ତିଭୂମିର ବିକାଶ କରାଗଲେ ସ୍ଥାନୀୟ ଆଦିବାସୀ ସମ୍ପ୍ରଦାୟର ଆର୍ଥିକ ଉନ୍ନତି ସହ କଳାହାଣ୍ଡି ପର୍ଯ୍ୟଟନର ଏକ ନୂଆ ପରିଚୟ ସୃଷ୍ଟି ହୋଇପାରିବ।
