ପୁରୀ: ପବିତ୍ର କାର୍ତ୍ତିକ ମାସ ଅବସରରେ ପୁରୀ ଶ୍ରୀକ୍ଷେତ୍ରରେ ଆରମ୍ଭ ହୋଇଛି ମାସବ୍ୟାପୀ ମହା କାର୍ତ୍ତିକ ବ୍ରତ। ସୋମବାର ସକାଳୁ ପ୍ରାୟ ୨,୫୦୦ ରୁ ଅଧିକ ହବିଷ୍ୟାଳୀ ସହରର ତିନୋଟି ସ୍ୱତନ୍ତ୍ର ହବିଷ୍ୟାଳୀ କେନ୍ଦ୍ରରେ ଏକତ୍ରିତ ହୋଇ ନିଜର ବ୍ରତ ପାଳନ ଆରମ୍ଭ କରିଛନ୍ତି।
ବ୍ରତଧାରୀ ମହିଳାମାନେ ସକାଳୁ ପୁଷ୍କରିଣୀ ଓ ସମୁଦ୍ର ସ୍ନାନ ସାରି ମହା ସଙ୍କଳ୍ପ ଗ୍ରହଣ କରିଛନ୍ତି। ପୂରା ମାସସାରା ସେମାନେ ତୁଳସୀ ଚଉରା ମୂଳରେ ରାଇ-ଦାମୋଦରଙ୍କର ପୂଜାର୍ଚ୍ଚନା କରିବେ ଏବଂ ନିଷ୍ଠାର ସହ ହବିଷ୍ୟ ଆହାର ଗ୍ରହଣ କରିବେ।
ପୁରୀ ଜିଲ୍ଲା ପ୍ରଶାସନ ଏବଂ ରାଜ୍ୟ ସରକାରଙ୍କ ‘ହବିଷ୍ୟାଳୀ ଯୋଜନା’ ଅଧୀନରେ ବ୍ରତଧାରୀଙ୍କ ରହିବା, ଖାଇବା ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
ପ୍ରତିଦିନ ହବିଷ୍ୟାଳୀ କେନ୍ଦ୍ରଗୁଡ଼ିକରେ ମହାପ୍ରସାଦ ସେବନର ବ୍ୟବସ୍ଥା କରାଯାଇଛି। ସଞ୍ଜରେ ପ୍ରବଚନ, ଭଜନ, କୀର୍ତ୍ତନ ଏବଂ ଅନ୍ୟାନ୍ୟ ଆଧ୍ୟାତ୍ମିକ କାର୍ଯ୍ୟକ୍ରମର ଆୟୋଜନ କରାଯିବ।
ସରକାରଙ୍କ ପକ୍ଷରୁ ସମସ୍ତ ସୁବିଧା ସୁଯୋଗ ମିଳୁଥିବାରୁ ହବିଷ୍ୟାଳୀମାନେ ଖୁସି ବ୍ୟକ୍ତ କରିଛନ୍ତି। କାର୍ତ୍ତିକ ମାସର ଏହି ନିଷ୍ଠାପର ବ୍ରତ ସମୟରେ ପୁରୀରେ ଏକ ସମ୍ପୂର୍ଣ୍ଣ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି।
